لما بتفرج عالافلام الابيض واسود واشوف الناس ازاى كانت عايشه بتحسر والله!،الناس دى كانت مبسوطه بجد،وكانوا عارفين ازاى ينبسطوا وازاى ينظموا يومهم،كان اليوم فى بركه،كانوا بيصحوا من بدرى وياخدوه من اوله وكان لكل حاجه وقتها ضحك ولعب وجد وحب..،كان فيه حريه مفيش كبت مفيش فراغ بالرغم ان مكنش فيه غزو تكنولوجى زى دلوقتى شاغل حياتهم ووقتهم !ولما كان التلفزيون بيشطب وتنزل عليه الستاره الملونه كانه بيقول للناس يلا كفايه ادخلوا ناموا !والعجيب ان الناس فعلا كانت بتنام !..

بص لحال الشباب دلوقتى وقعدتهم بالساعات على شبكات التواصل الاجتماعى وانا اقصد بالاخص الفيس بوك ،والمصيبه ان العدوى انتقلت للجيل اللى كنت بحكى عنه من شويه !ده اكبر دليل انه بجد لعنه ،ده مش انفتاح وتحرر عقلى دى نكبه فكريه وعبوديه من الطراز الاول ..

تلاقى الواحد قاعد عالفيس ال 48 ساعه فى ال24 ساعه !! وتيجى تكلمه ميردش ،هو اصلا مش سامع تحس انه منوم مغناطيسيا ،وتلاقى ام احمد بتحب فى ام عصام وياحبيبتى وحشاانى والله وقلوب بقى وحركات، وتلاقى احمد بيكتب بوست لسلمى بيعبرلها عن مشاعره وتلاقى منى ورانيا قاعدين متغاظين ويحسدوا سلمى وهما ولا يعرفوا اذا كان احمد بجد بيحب سلمى والا اذا كانت فعلا سلمى مبسوطه معاه ،،المهم اننا اتعلمنا نراقب بعض ونحسد بعض والامراض النفسيه بقت لا حصر لها بسبب هذا الفيس بوك ،والمصببه الكبيره ان حتى علاقتنا بربنا مسلمتش ،تلاقى اللى عايز يدعى ربنا يقوم فاتح الفيس ويعمل بوست بدعوته "اللهم....." ؛ والله يا جدعان ربنا ملوش اكونت عالفيس ،ادعى ربنا عالسجاده احسن مش لازم تعرف الناس كلها انك متدين وبتدعى ،وانت ياحمد لو كلمت سلمى وقلتلها انك بتحبها هتفرح اكتر ،وانتى ياللى مبتحبيش امك غير عالفيس عشان الناس كلها تعرف انك باره بامك وانتى اصلا مطلعها عنيعا روحى بوسيها من خدها هتفرح بيكى اوى ،،وانت يا ابو بدله عسكريه  خد بالك من سلاحك واستشهد وانت ماسكه احسن متكتب الشهاده عالفيس بوك!!

كل ده بقى كوم وهوس الصور ده كوم تانى من اول صورنى وانا مش واخد بالى لحد البوز..

هو احنا ازاى بقينا بنوحش فى شكلنا كده؟! ،دى مش روشنه دى اعاقه وتخلف عقلى ؛محدش قال متتصورش بس لما تلاقى نفسك اتصورت اكتر مستمتعت بالخروجه والناس الى خارج معاهم لازم تعرف انك مهووس ..

عرفت بقى ان دى مش شبكات تواصل اجتماعى ،ده انتحار جماعى ،وللعلم انا مبعبش فى المواقع انا بعيب علينا احنا لان الاجانب مبيعملوش ربع اللى بنعمله

لان احنا ببساطه شعوب عاشقه للفشخره وبنظيييت فى اى حاجه! مسالتش نفسك ايه كميه الصفحات وبوستات التريقه على وطنك وشعبك وناسك وانت زى الاهبل تشير وتضحك ويلا زيطه ..

اضحك اضحك وضحكهم عليك ...هما مين دول؟! هقولك انا ،هما اللى عملوا البوستات بتاعه اكتب رقم 2 وستختفى القطه اللى حملاها الفتاه فى الصوره !طب بالله عليكوا ازاى يعنى والا سحر والا شعوذه القطه هتختفى !والمدهش انك تفتح الكومنتات وتلاقيها كلها رقم 2 ؛؛ والا بوستات اثبت حضورك واكتب اسم بلدك وتلاقى كله يكتب وفرحانين اوى ما شاء الله!.

هما كده قدروا يعرفوا اكتر شعب عنده فراغ وقاعد ال24 ساعه عالفيس وعرفوا حدودك العقليه ،عشان يعرفوا بعد كده يضحكوا عليك ازاى ويوصلوا لعقلك بسهوله يحركونا زى الدمى ده اذا مبقناش دمى فعلا ..

هما مين دول اللى بتكلم عنهم؟! اسال نفسك...