رسايل صغيرة في الأول

* كمية الإعلانات الجنسية اللي في مصر دي بتحسسني أن مصر في حالة أسوأ من اللي كانت فيها في فيلم النوم في العسل.

* بالنسبة للشركة السعودية ومفاجآتها اللي مابتخلصش دي .. مش كفاية بقى مفاجآت وانبهارات ؟ بصراحة المفاجأة الوحيدة بالنسبة لي إن الاتنين اللي في الإعلان ده مقتنعين إنهم خبراء تسويق وكمان "موديلز".

* المستحيلات الثلاثة .. الخل الوفي والعنقاء .. وإني أكمل إعلان الكولا إياه بتاع وأنا رايح على مدرستي.

عموما الصورة دي منه .. حضرتك المنتج ده مش بيتشرب لما تفتح الغطا برضة ؟

ندخل في الجد بقى ..

"دلوقتي اتملك شقة في بورتو بسعر يبدأ من 100 جنيه في اليوم بس..

أحيانا أسأل نفسي.. هل من الأفضل عمل قنوات للأغنياء فقط ؟ بدلا من تدمير الأحلام الذي تحدثه هذه الإعلانات؟ ... لماذا يستفزون خمسة وتسعين في المية من المصريين بهذه الطريقة !

ثلاثة آلاف جنيه شهريا لن أقارنها لك بمرتب موظف حكومي كادح ، ولا طبيب حديث التخرج بمستشفى حكومي ، سأقارنها لك بمرتب مهندس شاب أو محاسب أو صيدلي يعمل في أحد أكبر الشركات بالقطاع الخاص ، يعمل خمسة أيام أسبوعيا تسع ساعات يوميا من أجل مرتب يبدأ من ألف جنيه حتى ثلاثة آلاف .. مُطالب أن يأكل ويشرب ويسكن ويبدأ حياته بهم.

لماذا تريدون تدميرأحلام الشباب بهذا الاستفزاز !! ماهو إحساس هذا الشاب وهو يشاهد هذا الإعلان على كوبري أكتوبر .. يرجع من عمله في ميكروباص أو حتى سيارته بعد يوم عمل شاق من أجل نصف هذا القسط شهريا .. أنا لا أعترض على الإعلان .. ولا المبلغ .. فقط أعترض على أن يكون السعر معلنا بصورة تبدو أنها مغرية ورخيصة جدا .. وفي كوبري يمر عليه كل فئات المصريين وليس داخل إحدى "الكومباوندات" مثلا.

"أحمد باعتلنا رسالة بيقول أنا 5 مرّات أطلب أغنية لعمرو دياب ومش بتشغلوهالي .. من عينينا يا أحمد بس كده إن شاء الله الحلقة اللي جاية .. وبنسمع دلوقتي حاجة للفنان جورج وسوف" - راديو.

لقد أصبح لدينا "إنترنت" و"يوتيوب" و"ساوند كلاود"... ولا يزال أحمد يترجاهم أن يسمع أغنية، بل ويرسل خمس رسائل لهم بجنيه ونصف الرسالة حتى يسمعها .. شكرا يا أحمد أنت إنسان جميل وجميع العاملين في المحطة يتمنون الآلاف منك.

"دي نضافة زمان  .. ودي نضافة دلوقتي"- تليفزيون.

لقد تطور الفكر الإعلاني بصورة رهيبة في كل المجالات ، وحتى الآن لم يطوروا إعلانات مساحيق الغسيل ، هم فقط يغيرون من يقوم بعملية الغسيل .. ومن يتسبب في بقع الغسيل .. وبقع الغسيل .. وتظل إعلانات مساحيق الغسيل رأس مالها قميصين أحدهما سكري والآخر أبيض .. ومادة ما ذات اسم أجنبي يوحي بأهمية ما.

" عادل بيقول ليارا ماتسيبينيش حرام عليكي .. ماتسيبيهوش يا يارا" - راديو

لقد أصبح لدينا "إنترنت" و"فيس بوك" و"واتس آب" و"فايبر" وموبايلات .. ولا يزال عادل يرسل ليارا عن طريق الراديو .. شكرا يا عادل أنت إنسان جميل .. صدقني وردة ستكون أكثر نفعا ورومانسية .. لا أريد أن أصدمك ، ولكن لو رجعت لك يارا بسبب هذه الرسالة فيجب عليك أنت أن تتركها.

"..... تطبق الشروط والأحكام"- راديو

أي إعلان له علاقة بأي عرض من عروض البنوك .. يبدأ وهو يرسم لك الحياة بشكل وردي مليء بالأمل ، ثم ينهيه بهذه الجملة المُبهمة : تطبق الشروط والأحكام .. أرى بعين الخيال .. الشرط الأول : البنك غير ملتزم بالإعلان.

".... أبو نواف : أريد تعارف جاد – زهرة العرب الخجولة : مشكور أخي على الورود – حزين الوحداني: أبغي مطلقة" شريط الرسائل في إحدى قنوات الأغاني.

لقد أصبح لدينا "إنترنت" و"فيس بوك" وواتس آب" و"فايبر" وموبايلات .. ولا يزال هؤلاء يسكنون في كهف ما في بقعة مظلمة ما من العالم الإنساني .. يكلمون بعضهم بلغة ما انقرضت منذ عشرين عاما .. كم أنتم بائسون .. وكم أتمنى أن تذهبوا جميعا كـ "باكيدج" إلى أكبر شات روم بالجحيم.

"المذيع والمذيعة : إحنا النهاردة هنسمع رسايلكم ونبلغها للي عاوزين تبعتوها له .. متصلة : بعد إذنكم كلموا سامي وقولوله ريحة شراباته وحشة وبتقلب البيت .. المذيع والمذيعة : هاها هيهيهي ههوهو .. هنكلمه حاضر .. المذيع : أيوة يا سامي مراتك كلمتنا وبتشكيلنا من ريحة شراباتك .. سامي : فيه ده إزاي تطلّع أسرار البيت .. ده كلام ..؟ أنا بجيب شراباتي من أحسن أماكن  .. و .." راديو

رسالة صغيرة في الآخر ..

-رسالة لقناة الإعلانات – الأغاني سابقا- نجوم إف إم .. أنا بحبكم جدا .. بس أنا بسمع البرنامج أو الأغنية وبقلب القناة على محطة تانية وقت الإعلانات على فكرة .. أنا عارف إن الإعلانات رأس مال المحطة بس زادت أوي .. خلّوا بالكم إنتوا مش وحدكم زي زمان.