ساعات بنشوف ف حياتنا ناس بنحتار فيهم وف الحكم عليهم .. نحطهم ف خانة الطيبين والا ف خانة الاشرار ؟
دول تلاقي ليهم افعال كويسه جداً وممكن يقفوا جنبك ف حاجة ويساعدوك ، وف مرة تانية تلاقيهم عملوا فيك موقف جامد وجع قلبك قوي ..
طب دول يتصنفوا تحت خانة ايه ؟ واتعامل معاهم ازاي ؟
.........................
احنا كبشر جوانا الاتنين .. الخير والشر ، ربنا بيقول ( ونفس وما سواها . فألهمها فجورها وتقواها ) يعني فينا الاتنين ..
بس بنسب ..
يعني ناس بيبقى الخير عندها 60% والشر 40% ..
وناس تانية عندها الخير 30% والشر 70% ..
وهكذا ، النسب بتختلف
والانسان بقى حصيلة النسبة الأكبر ..
اللي الخير فيه غالب على الشر يبقى طيب ..
واللي الشر فيه غالب على الخير يبقى شرير ...
..............................
طب والجزء الخير اللي فيه دا مش ح نحسبه ؟
ح نحسبه .. بس الانسان الصح المتزن المفروض انه يكون بيسعى انه يزود نسبة الخير دي عنده عن نسبة الشر ، بقية الآية ( قد أفلح من زكاها . وقد خاب من دساها )
اللي بيظبط نفسه ويهذبها ويحاول يزود نسبة الخير عنده هو اللي ح يفلح ..
...............................
طب وانا اتعامل معاهم ازاي ما انا مش عارف النسب ..!!
بيبان من المواقف ...
اللي مواقفه السيئة معاك اكتر من المواقف الكويسه يبقى شرير ولازم تاخد حذرك ف التعامل معاه ، ولو التعامل مش ضروري يبقى خليها علاقة سطحية جداً ، وف بعض الاحيان ممكن تقطع العلاقة وتنهيها خالص في حالة زيادة الضرر من الشخص دا ..
ولو مواقفة الكويسه اكتر من مواقفه السيئة يبقى نسيبه بس نعامله بحذر برضه لأنه ممكن يكون مش بيسعى انه يزود الخير اللي عنده دا ، وطبعاً الخير والشر بيتصارعوا جوا الانسان ، والأقوى فيهم هو اللي ح يغلب على الشخص ، ودا ح يبان على الشخص نفسه ..
اللي بيتغير للأحسن وابتدى يظبط عيوب كانت جواه يبقى فعلاً بيزكي نفسه وبيسعى انه يزود نسبة الخير ..
إنما الشخص اللي بيتغير للأسوأ وابتدى يكتسب صفات سيئة كمان ماكانتش فيه بمرور الأيام يبقى بيعمل العكس ..
وفي النهاية احنا مطالبين بالعلاقة السطحية في جميع الأحوال لراحة الطرفين ..
حد فهم حاجة ؟!!!!
#أميرةتوفيق
-
أميرة توفيقخريجة كلية الزراعة جامعة القاهرة - احب الكتابة جدا منذ الصغر