خريج توكتوك

بقلم : حسن غريب

__________________________________________________________________________

طاب نهاركم أصدقائي صديقاتي ....

من الطرائف اللي فوجئت بيها النهاردة اول ما فتحت السايت كم الرسايل المهولة اللي بتتغزل في أسلوب الكتابة وإني إزاي كاتب وناقد ومختار الكلام ، وفي ناس سألت انت خريج ايه!؟ ولما رديت اني خريج توكتوك كان الضحك الأكبر أيوة ضحك هستيري كمان؛ الكل مفكر لما بنزل بوست كلامه جديد إني واخده كوبي بيست أو إني لازم اكون فيلسوف وخريج حاجة عملاقة ومكلكعة عشان يكون في أسلوب أدبي ولا خطابي ممتاز من وجهة نظر البعض؛ أحب أقولكم أنا ما زلت متمسك بردي ؛ آه خريج توكتوك، وخريجي التكاتك النهاردة صار معهم ليسانس وبكاؤليوس وربما دكتوراة او ماجستير وقلة منهم غير متعلم ولم ينال مؤهلات بتوع التوك توك بيعتبروا ناس بيمثلوا الطبقة المتوسطة اللي بتحاول تلهث مجتهدة عشان تحافظ لنفسها على نفس المستوى اللي هي عايشة فيه لأنها ببساطة مينفعش تقل عنه، مهما حصل، ومش عيبة ولا حاجة تعرني إني أرد الرد ده، الحاجة اللي تعر وتكسف بجد؛ إنك لما تقرا الرد ده تفتكره استهتار ولا مهانة لسؤالك الكريم؛ يا عزيزتي؛ إحنا ببساطة فعلا بقينا في مجتمع طبقي صرف، ومبيبصش إلا للي في إيده كاشات ومن النوع الغالي الحمد لله على نعمه وفضله، والحمد لله على نعمة العقل قبل كل شيء .