دخلت سيدة الصيدلية ، ملابسها انيقة و مكياجها يكسو وجهها ، ترتدى تايير ذو الوان متناسقة ، كعب يحملها الى السماء و غرور يملأها سيدفنها بجوف الارض حتما.

من فضلك يا دكتور عاوزة لبان..

كانت الدهشة تسيطر على وجهى ، و تسائلت لماذا اختصت الصيدلية لتشترى لبان !

ف هناك الكثير من الاكشاك بجوارنا !

استطردت قائلة عايزة ب عشرة جنيه لبان..

اعطيتها تشكيلة من اللبان و خرجت و لم اخرج ذلك الموقف من ذاكرتى..

دخل ذات مرة رجل يبلغ من العمر الخمسين ، و قال :

فيه صيدلية اسمها (كذا ) ؟

جاوبته معنديش فكرة !

استطرد قائلا : غريبة !

حضرتك دكتور ؟

جاوبه البالطو الذى ارتديه قبل ان يجاوبه لسانى ، ايوة !

قال : و ازاى متعرفش اسامى الصيدليات ؟

جاوبته على الفور و لم استطع ان امتنع عن ما تفوهت به..

حضرتك انا دكتور درست ادوية مدرستش صيدليات !

خرج و الاندهاش مازال فى عينيه ، و لكنى لم استطع ان انسى ملامح ذلك الرجل الخمسينى الذى تفوق فى بجاحته على رؤساء امريكا..

دخلت فتاة فى مقتبل شبابها ، سألتنى عن دواء للسكر ، جاوبتها :

ممكن اسم الدوا بظبط اللى الطبيب كاتبه ليكى ؟

قالتلى على الفور و قبل انهاء كلمة ليكى..

لا انا باخده من نفسى..

قلت فى نفسى ليه هو شيبسى !

ثم قلت لها ادوية السكر لازم تتاخد بأمر الطبيب..

اخرجت اسم الدواء من على شاشة هاتف المحمول و قالت : موجود و بكام ؟

و كأنى كنت اكلم الهواء الطائر !

موجود !

طيب عايزة علبة..

اعطيتها الدواء و خرجت و لم تخرج تلك الفتاة من ذاكرتى..

دخل شاب الصيدلية و كان يريد ان يأخذ حقنة للاعصاب ، كانت معه ، قمت باحضار السرنجة و قبل تحضيرها قال لى بس انا عايز اضيف عليها امبولة تانية..

استغربت جدا ، لا مينفعش !

قال باستغراب : ليه ؟

قلت مش هتعمل مفعول..

قال ان باخدها كدا بقالى اكتر من ٨ شهور !

قلتله و حاسس بنتيجة ؟

قال لى : بصراحة لسة

جاوبته يبقى تسمع كلامى عشان مضيعش عمرك بتصطاد سمك فى ماية !

استغرب من كلامى و صمم على اعطائه الخليط الذى لا يسمن و لا يغنى من جوع..

قلت له مصمم ؟

قال : ايوة..

قلت له للاسف الحقنة التانية مش عندى..

قال لى : خلاص مش عايز اخد حاجة و كان الغضب على وجهه ساطعا مثل الشمس فى اغسطس..

خرج و ظل الموقف عالقا بذهنى...