اليوم غادي نهضر على نظرية فيزيائية فلسفية عبثية.. كاين لي كايسميها ''نظرية الفوضى'' و لكن أنا ضد هاد التسمية حيت فالحقيقة هي غي جزء منها.. النظرية لي كانهضرو عليها هي ''تأثير الفراشة'' أول واحد أسس ليها هو ادوارد لورينتيز لي قال كلمته الشهيرة لي عليها تسمات هاد النظرية حيث قال ''ان رفرفة جناح فراشة في البرازيل ستؤدي الى عاصفة في تكساس''..

هاد النظرية كاتبين لينا أن بعض الأمور لي كاتوقع و كاتبان لينا تافهة راه عندها تأثير كبييير و بأن أحداث بسيطة بزآاف تقدر تأدي لنتائج كارثية .. مثلا فراشة رفرفات بجناحها فأستراليا غادي تحدث اضراب فالهواء لي يقدر يتحول من بعد سنوات لإعصار فالمغريب .. هاد الشي كايبان ماشي منطقي ياكو؟ أجيو نمنطقو ديلمو بالزز..

نتا مثلا غادي فالطوموبيل و حداك الجبال .. نتا كلاكصونيتي هاداك الصوت لي خرج راه هو فالحقيقة موجات صوتية كاتنتاقل فجزيئات الهواء و كاتختارق الجدار و كاتنتاقل لذرات الصخر لي كاتكون لينا جبل .. ملي كادخل ليه كايبدا الجبل يتشقق و يتخلخل و من بعد سنوات يقدر ينهار و هاد الشي كامل بسباب كلاكصون .. الأمر دبا كايبان منطقي حدث تافه و لكن على المدى البعيد كايكون عندو تأثير كبير .. ناخدو مثال آخر باش نفهمو أكثر و هاد المثال هو لي كايحاول بيه أصحاب النظرية تبسيطها للناس .. مثلا تخيل معايا فراشة فالهواء و كاين ضفدع فالأرض كايحاول ينقز عليها باش ياكلها ، الفراشة طارت فالهواء و فشلات المهمة و صافي مشا فحالو يقلب على شي حاجة أخرى تال هنا كل شي مزيان .. نتخيلو نفس المنظر و لكن بسيناريو آخر الضفدع قدر يلتقط الفراشة يعني ماغاديش يمشي يقلب على حاجة أخرى و غادي يبقا فبلاصتو و غادي يجي ثعبان غادي ياكل الضفدع .. بينا فالحالة الأولى لي ماقدرش يلتاقط فيها الفراشة غادي يمشي يقلب على حاجة اخرى يعني الثعبان هو الأخر ماغاديش ياكل الضفدع و غادي يمشي يقلب على حاجة اخرى فتلك اللحظة دايز واحد الإنسان من حدا الثعبان هاد الأخير حس بالخوف و باش يدافع على راسو غادي يلذغ داك الإنسان و غادي يموت ... جمع معايا دبا هاد السيناريو كامل غادي تلقا أن النتيجة هي فشل الضفدع في التهام الفراشة أدى بالنهاية إلى مـوت إنسان

هاد النظرية عندها علاقة تا بالإنسان .. راه هاد الظروف لي حنا عايشين فيها دبا تقدر تكون بسبب أن واحد فـ 1736 دخل للطواليت برجلو اليسرى ماشي اليمنى ههههه و نتا جالس دبا كاتقرا هاد الشي الوضعية د الجلوس ديالك عندها تأثير و كون جلستي 3 سنتيميتر لليمين أو اليسار هاد الحركة البسيطة تقدر تأثر على أجيال و أجيال و تعيشهم فالعذاب بسبب أنك تحركتي 3 سنتيميتر ... كاين واحد الفيلم أمريكي ( The Butterfly Effect ) كايهضر علي كيفاش أن الإمتناع عن ابتسامة فعيد ميلاد غادي يبدل حياة ديال أسرة كاملة.. كانصحكم تفرجو فيه ،انته