جالي سؤال ع الخاص للأسف بعد ماقريته ماقدرتش أنام. ببساطة كانت الإجابة عليه أصعب من أي إمتحان:

" أميرة قولي لي بالله عليكي هو الجواز عن حب 💑 أفضل ولا جواز الصالونات"

طبعا انا السؤال مش أول مرة أسمعه بس برضو كل مرة بحس نفسي مرتبكة أدامه. وافتكرت موقف ظريف كان حصل أثناء لقاء صديقات غاليات علي قلبي وكان السؤال حضر بذهن إحداهن ، يومها انا ضحكت وهما كمان ضحكوا لدرجة اني مش كنت متحكمة في دموعي، الضحكات امتزجت مع الدموع حاجة كده ذي العسل المر.

ببساطة شديدة السؤال الفلسفي الخطير المصيري ده يتجاوب عليه بتشبيه بسيط جدا :

من #وجهة_نظري الشخصية الجواز ده ذي مركب ⛵في البحر، انت او انتي غرضكم من المركب دي إيه ؟ اكيد ليك غرض وهدف وفي دوافع ساعدتك تاخد الخطوة دي.

في المركب شخصين👩👨، والاتنين من حقهم يستمتعوا ويرتاحوا ويكونوا سعداء 😊، ماينفعش أبدا واحد يفضل مشمر بنطلونه ورامي نفسه في الميه عشان يدفع بالمركبة للأمام والتاني مجرد متفرج 😎

تخيل 🤔أو تخيلي 🤔 لو في مشكلة في المركب⛵ دي

⬅️ هل ينفع انهم ينزلوا يمسكوا فيها بايديهم ويفضلوا يدفعوها عشان تكمل طريقها في البحر؟

⬅️ طيب ينفع الست ترتاح في المركب والرجل هو اللي يتعب؟

⬅️ أو يرتاح هو وهي تتعب؟

⛔ ماينفعش ابدا ومش هيعرفوا يكملوا كده ❌

ليه🤔🤔؟

لان دي ماكانتش تصوراتهم ولا توقعاتهم للرحلة في البحر علي المركب⛵ دي وهما مع بعض👨👩، توقعاتهم كانت مختلفة وأحلامهم كانت أجمل.

⬅️⬅️ في الجواز كل انسان من حقه أو أهم حقوقه يكون مبسوط😊 ومتطمن وسعيد 😄 بكل الصور سواء الكلمة الحلوة، الغزل الجميل أو الطمأنينة والأمان وقبل كل شيء الحب💏، بمعني: انهم يحبوا يكملوا مع بعض مهما كانت المشاكل.

⬅️⬅️ مهم جدا يكون لكل طرف رصيد لا بأس به عند الطرف الآخر والأهم تعرف تشحن رصيدك من وقت للتاني، عشان في وقت ما ممكن تحتاج تسحب من رصيك وتفاجأ إنه صفر😯، وقتها هتكون النهاية🔚.

⬅️⬅️ واحنا بنفكر 🤔في إجابة السؤال ده👆 لازم نتخطي حاجز الوقت شوية ونسبق السنين شويتين ونفكر بكرة هيكون شكله إيه؟ ومستقبلكم مع بعض ملامحه إيه؟

⛔ بلاش تجري بكم السنين وتلاقي نفسك اشتغلت واجتهدت وسافرت ورجعت في خلال كام سنة كنت واخد كام شهادة وكام ترقية واشتريت بيت هنا وشاليه هناك واولادكم كبروا واعتمدوا علي نفسهم ولهم حياتهم ومشغولين بها،

وفجأة😯😯....

. هتكتشف انك كبرت والسنين جريت بيك،

. شعرك الأبيض🧓 ده معناه انك خسرت من عمرك كتير،

. هتكتشف انها بتقول لك إيه الألوان دي انت كبرت،

. هتلاقيه بيقول لك انتي مالك عجزتي 👵كده ليه،

. هتلاقيه مش بيراعي مشاعرك ذي الأول ،

كل ده صحيح ، بس انت اللي سمحت/سمحتي للوقت يجري ويسرق عمرك، كان عندك هدف من رحلتك ع المركب⛵ نسيته وكملت وكأنك في رحلة لشخص تاني، رفضت تحتكم لعقلك وتدرس أبعاد المشكلة وتحلها أو تنسحب/ تنسحبي.

وهنا هنحس بالتعب وبالسنين اللي انسرقت منكم وانتوا مصممين تدفعوا المركب⛵ بدل ما تحلوا المشكلة أو ترجعوا وماتكملوش، هتكتشفوا انكم خسرتوا عمركم وكسبتوا شرف المحاولة انكم راضيتوا المجتمع لكن جنيتوا علي نفسكم.

هيبدأ كل واحد يدور ع الحاجة اللي ناقصاه ومش ممكن هيلاقيها مع التاني.

الجواز عن حب وجع ناس كتير وجواز الصالونات وجع ناس اكتر لكن جواز العقل دايما هو الرابح.

#amira_ibrahim_neues_leben