هحكيلوا حكاية بصراحة هي مش حكاية أوي هي رسالة لشخص كان نفسي أقولها بقالي كتير لما كتبتها حبيت أشاركها معاكوا يمكن تكون رسالة ليكو إنتو كمان، رسالة عشان تبدأوا النهاية 👀؛ فيه إتنين أخوات متجوزين ومخلفين، الأول جاب لإبنه شكولاتة رخيصة كان بيجيبهاله كل يوم ومن فتره للتانية يديله حتة صغيرة من الغالية شوية فالولد كان مبسوط لإنه متعود على طعم الرخيصة وكمان بيحب الغالية بس عنده دراية ووعي إن أبوه مش هيقدر يجيبله من الغالية كل يوم فكل يوم كان بيشكر باباه👪؛ لكن الأخ التاني جاب شكولاتة غالية أوي لإبنه وعوده عليها وفي يوم جابله شكولاتة رخيصة فالولد داقها زعق وإتخانق وعيط ورفض ياكلها😣 باباه وعده إنه هيجيبله حاجة أحلى شوية🤔 بس مجابش ذي الغالية أوي، فالولد غضبه زاد أوي لإنه مستني الشكولاتة بتاعته فالأب زعل جدًا وقاله: أنا أعملك إيه أكتر من كدا😠
رد الولد: خلاص يا بابا لو مش هتقدر تجيبلي الشكولاتة اللي بحبها متجيبش شكولاتة تاني😐
فالأب فضل متضايق لأنه عارف إن إبنه زعلان وفضل كام يوم بيكلم أبنه بحساسية بس مش قادر يجيب الشكولاتة الغالية دي كل يوم ذي الأول الإبن قعد يفكر🤔وقرر يروح لباباه يقوله: خلاص يا بابا أنا مش عايز شكولاتة تاني🙂 فحضنه الأب وقاله هحاول أجيبلك منها تاني كل فترة فالولد قاله لا يا بابا بلاش عشان مفضلش كل يوم مستنيها وتجيبها مره ويرجع يوحشني طعمها فمتزعلش خلاص يا بابا انا هتضايق كام يوم وهنسى طعمها وإنت هتفضل بابا اللي بحترمه واللي دوقني شكولاتة حلوة😘 بس حضرتك غلط من الأول إنك عودتني على حاجه وبدلتها مره واحده حتى من غير ما تجهزني إنك مش هتقدر تجيبها تاني بس حصل خير 😊.
أنا كل ما بدخل علاقة بحس إني طفل صغير بيدوق أكلة جديدة لأول مرة والأكلة بتتعمل كل يوم فلو عجبته بيفضل ياكل منها ويتعود عليها ويشكر اللي بيعملها ذي ما الطفل الأول عمل بس لو الأكلة دي إتغير طعمها بيعمل ذي الطفل التاني ما عمل وخاصة لو اللي بيعملهالي معمليش تأهلين نفسي وتدريج إنه هيغيرها مثلاً "إن الملح اتمنع من السوق" وخيرني إذا كنت هعرف أكلها من غير ملح ولا لا في الأخر بعمل ذي الطفل التاني وبفضل شايلة الفضل للي عملها إنه دوقني في يوم حاجة جديدة وكانت حلوة😀 وبيتكون عندي الوعي إنه دي قدراته وإنه مش هيقدر يكمل.
الإهتمام اللي أي حد بيديه حتى لو كان قليل واللي قدامه رضي بيه مينفعش يتغير مرة واحدة وحتى لو الإهتمام دا إتغير بيبقى بإتفاق بيني وبين الشخص بالرفض أو القبول✍🖎 ولا يعتبر الشخص الأخر أن هناك إتفاق ضمني لم يقال إنت مثلًا إما غيرت مشاعرك معايا عملت كدا من غير تأهيل ففضلت أزعق وأعيط ولما رجعت وعدتني إنك هتهتم بس مش ذي الأول معاجبنيش طعم الشكولاتة الجديدة😥 فقررت إني أبطل أكل شكولاتة🤗 وأكيد هتضايق شوية😐 بس يومين وهنسى طعمها 😉.
بس هتفضل صاحبي اللي لو إحتجني هيلاقيني ولو إحتاجتله هلجأله😍،إنت رصيدك كحبيب خلاص خلص🙄 بس كصديق لسه ليك رصيد بس حاسب ليخلص هو كمان؛ شكرًا عالشكولاتة ومتنساش تقولي رأيك فالقصة😂😂.