" جبر الخواطر... قصة رصيف ٦ "

كنت مسافرة في القطار 🚇 وقمت اتصل بالتليفون 📱ووقفت جنب الباب، لفتت نظري سيدة 👩‍💼يمكن في الاربعينات من عمرها وشكلها مضطرب جدا😱.. خلصت مكالمة واتديرت أرجع مكاني بس قبل ما ارجع بصيت عليها، لقيتها بتعيط 😢 وتقريبا بتكلم نفسها.

رحت أسألها لو محتاجة مساعدة أو تعبانة لقيتها مش بتتكلم ألماني.

حاولت أكلمها انجليزي طلعت ماتعرفوش أصلا، يبقي الحل نكمل ألماني وأكيد هتلقط اومال عايشة هنا اذاي؟ طيب إيه المشكلة؟ مش بتنطق غير لغة انا ماعرفهاش، بس بعد مدة من الوقت عرفت انها بتتكلم بولندي.

طلعت لي تذكرة القطار ولما قؤستها عرفت انها هتنزل في Magdeburg وتغير القطار وتاخد اتجاه فرانكفورت.

ده فهمته من التذكرة فين بقي المشكلة؟ بتتكلم برضو بولندي وتشرح مشكلتها وانا مش فاهمة حاجة وبكلمات بسيطة شرحت لها اني مش فاهمة، فضلت ابص حواليا يمكن ييجي حد يساعد أو يكون بولندي يفهمها ويحل المشكلة.... بس للأسف مافيش غير واحد ألماني قاعد جنب الباب قال لي مش فاهم ولا كلمة ومش عارف أساعدها مش بتتكلم ألماني 😏 شكرا يا كبير منكم نستفيد😏🙄

اللي فهمته لما فضلت تشاور علي أرقام واسم المدينة انها متأخرة وفعلا قطارنا متأخر اكتر من ١٢ دقيقة وكده مش هتلحق تنزل تشوف اي رصيف عليه القطار التاني وبدأت تبكي 😭

قلت لها بالألماني انها هتوصل علي رصيف ٦ وقطار 🚉 فرانكفورت طالع من رصيف ٨ والاتنين نفس الرصيف، طبعا مش فهمت اضطريت انقل لها فكرة انها تنزل بس تبص أمامها هتلاقي قطار فرانكفورت بمعني انه نفس الرصيف مش هتجري بدأت امثل لها إني خارجة من الباب ده والقطار في وشي مباشرة، فجأة حسيتها فهمت وقالت كلام كتير بالبولندي يعني المهم فهمتني.

رجع اخونا الألماني للساحة سألني هي كده فهمت؟ قلت له اه قال لي وانتي فهمتيها اذاي؟

انا حقيقي مش كنت فاهمة ولا كلمة منها بس حاولت استوعب مشكلتها واتواصل معاها ذي ما بيقولوا الألمان:

Mit Händen und Füßen!

ماهو مش منطقي برضو توصل لمرحلة البكاء والخنقة دي واشوفها وأغمض عيني 🙈 عشان آل إيه مش بتتكلم الماني.

قلت له مشكلتها كانت اللغة يعني لسانها لكن مشكلتك انك تجاهلتها يعني انسانيتك، هي حاولت وهي مش عارفة لغة انها تشرح المشكلة، وانت رفضت حتي تحاول.

الإنسانة دي نزلت ووجدت القطار فعلا علي نفس الرصيف، جرت عليه وهي بتبص لي وفرحانة اوي كأنها بتجري علي حبيبها مثلا وكان أجمل مشهد شوفته وهي بتبتسم 😁 وفي عيونها لسه في دموع خوف 😢 وإن كانت لحظتها خلاص عدت.

في #وجهة_نظري جبر الخواطر ده يمكن يكون عبادة ربنا يثيبنا عليها، لو انت كإنسان مش بتعرف تجبر خاطر الناس فأنت اكيد محتاج تتعلم حاجة مهمة أوي مش لبريستيجك دي لانسانيتك. جبر الخواطر بيحول صاحبه فجأة بمفتاح 🗝 بيفتح باب أزمة... مشكلة... كرب.... وبيزيل هم من علي قلب انسان يعني انت بتقدم خير لغيرك ، رسولنا الكريم صلى الله عليه وسلم قال:

" إن من الناس مفاتيحا للخير مغاليقا للشر، ومن الناس مفاتيحا للشر مغاليقا للخير، فطوبي لمن جعل الله الخير علي يديه"

⬅️ انك تجبر خاطر إنسان يعني مش يهون عليك ولا يهون وجعه ولا دموعه ولا اللي بينكم نفسه يهون: صداقة، مودة، حب، أخوة، عشرة أو صدفة.

⬅️ انك تجبر خاطر إنسان يعني جواك قلب بيحس بالناس ومشاكلهم واوجاعهم،

⬅️ انك تجبر خاطر إنسان يعني جواك خير ربنا ميزك به عن غيرك،

⬅️ انك تجبر خاطر إنسان يعني صعب عليك تشوفه محتاج كلمة حلوة وتستخسرها، أو طبطبة وتتأخر عنه، أو مساعدة فتتراجع، أو دعم فتستندل.

جبر الخواطر عبادة ورقة قلب وإحساس ناس كتير اليومين دول افتقدته، بعد مت قلوبهم اتعلمت القسوة وسكنتها الأنانية 😔 وانا شوفت منهم كتير 😞😔

لو في حياتك حد من النوع اللي بيعرف يجبر بخاطرك احمد ربنا وقل له وعرفه أنه نعمة كبيرة.

#amira_ibrahim_neues_leben