وجهة نظر

حسن غريب

-------------------------------------------------------------------

فاكرين فيلم " الباشا تلميذ "

شوفتوا لما انجي عرفت إن بسيوني ظابط ؟ قالتله إيه ؟ انهارت وقالتله ليييه كدا ؟ ليه ادتني كل حاجه وف ثانيه خدت كُل حاجه ! دنا أتغيرت عشانك ! واتصدمت صدمة عُمر

- عاوز أقولك أن سنة ١٩٥٠ كان في دكتور علم نفس اسمه " Curt Richte " الدكتور ده عمل تجربه غريبة شوية

جاب شوية فيران 🐀 🐁 .. وحط كُل فار منهم في جردل مصنوع من الازاز وملي نُص الجرادل ميه وولع سيجارته ومسك ساعته ف أيده وفضل يحسب الوقت ويراقب الفيران وهي عماله تعوم في الجرادل ..

كُل فار جوا جردل .. وليه ازاز بالذات ؟ قالك عشان الفار ميعرفش يتسلق ويخرج

في فار قعد ٥ دقايق واستسلم للغرق التاني ٤ دقايق .. اكتر فار فضل يقاوم الغرق ١٥ دقيقه وبعدين استسلم .. الدكتور " curt " قرر يكرر نفس الحوار دا تاني بس بشوية تغيرات بسيطة .. حط الفيران جوا الجرادل الازاز تاني بس كان بيراقبهم والفار اللي يحس انه خلاص هيغرق كان يطلعه وينقذه وينشفه ويسيبه يرتاح .. كل الفيران عمل معاهم كدا اللي يحس انه هِمد وهيغرق يطلعه وينقذه قبل لما يغرق بشويه .. وبعد لما طلعهم ونشفهم وارتاحوا .. قام شايلهم وراميهم في الميه تاني ! طبعًا إحنا قولنا أن اكتر فار قاوم الغرق قعد ١٥ دقيقه واستسلم ! .. تخيلوا الفيران لما اترموا تاني قعدوا قد إيه ؟ اقل فار فيهم قعد يقاوم ٦٠ ساعة ! تخيلوا ٦٠ ساعة مش دقيقه ! وفي فار منهم قعد يقاوم الغرق ٨١ ساعة !!

يعني قعد حوالي ٤ أيام يقاوم الغرق من غير استسلام .. أشمعنا يعني طولوا المرادي في المقاومة أضعاف أضعاف المرة الاولانية ؟ قالك لأنه ف المرة الأولي كانوا فقدوا الأمل واستسلموا .. لكن ف المرة التانية لما طلعهم وأنقذهم قبل الغرق ونشفهم ورماهم تاني كان عندهم أمل أن في طوق نجاه هينقذهم .. بعد دقيقه بعد أتنين انشاله بعد ٨١ ساعة !!

عاوز أقول أن الأمل هو الخيط اللي ممكن يتعلق بيه أي إنسان القشايه اللي بيتعلق بيها الغريق

فأوعي تعشم حد وتديله الأمل وتخلي بيه ممكن يقاوم الدُنيا ويتحدي العالم علشان عنده أمل وثقه فيك علشان مُتفائل انك يستحيل تخذله أو تخلي بيه

الفيران قعدت تقاوم علشان عندها يقين أن في حد هينقذهم .. الإنسان ممكن يتغير ١٨٠ درجه لو إنسان علقه بحلم " سواء جوازه .. شُغلانة .. يساعده يحقق حاجه معينه " والله ممكن ينام ويقوم يحلم باليوم دا !

متقولش لابنك لما تنجح هجيبلك كذا وابنك يأكل الكتب وترجع تخلف وعدك ! في ناس ممكن تعلق أحلامها وطموحاتها علي كلمه ووعد منك !

وكمان حاجه تانية : ممكن الإنسان قدراته تتغير وتبقي تهد جبال لو نفسيته حلوه .. أنا أمي ممكن تشيل البيت وتقلبه فوقه لتحته تنضيف لو أبويا باس دماغها وقالها الله يقويكي !

بيديها زقه ودفعه تقويها .. وبيشحن بطارية السعادة جواها !

العيل الصغير بيصحي بصعوبة للمدرسة وبطلوع الروح .. بس يوم العيد بيصحي الفجر وممكن يطبق ! من فرحته

تخيل دكتور الكلية طبطب علي كتف الطالب وقاله أنا متأكد انك قدها

تخيل واحد قال لمراتة أنا مقدرش استغني عنك وجبلها وردة دي ممكن تولع في البيت من فرحتها

ف أوعي تدي الأمل لحد وتقطعه .. جايز تكون أنت الحبل الوحيد اللي غيرك شادد فيه .. وأوعي تكون بأيدك تفرح حد وتحزنه وتكسر بخاطره كدا أنت بتهده وأنت مش داري .. أوفي بوعدك وفرح اللي منك .. لان ربنا هيحاسبك علي كدا يوم القيامة ..

الحُزن بيهد والاكتئاب بيدمر الإنسان من جوه