#التسعينات حرب الكويت

لو كنت شابا #عراقيا في التسعينات

كنت حتما ستتعرض الى هذه الأحداث :

1. تنام بليل منتظر تتسرح من الخدمة العسكرية حتى تشوف طريقك وتفكر تشتغل او تتعيين حتى تزوج حبيبتك خطيبتك وتكعد الصبح تسمع بالاخبار الساعة 6 فجر يوم 2 - اب - 1990 الجيش العراقي يدخل الكويت بصوت المذيع مقداد عبد الرضا وخطابات صدام دخول للكويت وانذار "ج" والتحاق فوري وتمديد الخدمة ويلغى التسريح وتنصدم وتتبخر كل مخططاتك الى الابد .

2. انت بعدك ما مصدك من خلصت من حرب إيران والي ضليت تدك و تركص شهر بالشوارع مصلخ ممصدكين خلصت والرمي والعاب نارية ورش الماء والنذور وطش فلوس والموسيقى فرحانين طلعنه سالمين ولم تموت او تعاق او تؤسر فجئة كل شي ينتهي بلحظة .

3.بعدك ممستوعب الصدمه تسمع بالاخبار عبر الراديو بفرض حصار اقتصادي شامل وتطبيق عقوبات اقتصادية شديدة على العراق وينهار الدينار العراقي انهيار كارثي من القمة الى القعر و تنفجر الاسعار وتختفي البضاعة وتسقط العملات الصغيرة المعدنية وينقطع كل شي مستورد نهائيا وننقطع عن العالم الخارجي وخطابات صدام كل يومين ونص خطاب يهدد العالم بالحرب ويتوعد ويهدد والوسيلة الوحيدة الراديو .

4. يتم استدعائك انذار ج او احتياط او يلغى تسريحك من الاصل وتمدد الخدمة وتتبخر الفرحة والامل نهائيا وللخطوط الاولى.

5.مجلس الامن والامم المتحدة والجامعة العربية تطلب و تهدد العراق بان ينسحب فورا دون اي شروط وكل العالم يطلب من العراق انسحاب فوري وبالحاح وصدام يرفض ويتجاهل ويهدد ويهدد ويتوعد بالمزيد من الحرب والشغلة تنلاص عليك .

6.صدام يدز سبع رسائل الى ايران يعتذر ويعترف باتفاقية الجزائر ويطلب تعاون ولا كأنه انه خاض حرب ثمن سنين ومقتل نص مليون ضحية من ورى الغاء الاتفاقية وتالي يرجع الها وايران يكلوله لو داز مثل هاي الرسالة من البداية جان مصارت حرب اصلا ..

7. يعطي مجلس الامن مهلة ويحددون موعد نهائي انسحاب 16-يناير كانون الثاني -1991 من الكويت وبدات جيوش امريكية وحلف الناتو ودول عربية واسيوية بمجموع 34 دولة توصل للخليج وللسعودية ويستعدون للحرب والوقت يبدأ العد التنازلي .

8.البضاعة تختفي الناس تخزن طحين ورز ودهن وشكر ونفط ونرجع (للفانوس ) و ال (لاله) ونبني تنور طين ونشتري حطب بالاطنان ونملي كل اوعية البيت ماء وناس حفرت مواضع وناس نهزمت من بغداد والبصرة ومراكز المدن لمدن بعيدة والأرياف لمناطق اكثر امن ..

9. الدينار يستمر بالسقوط والانهيار دولار مقابل 100 و 200-دينار البضاعة في السوق تختفي ابسط السلع الجكاير البطاريات الشاي تختفي و تشتري تتن تبغ كيلوات ورق لف وتخبئه وتنتظر المجهول .

10.يبدا فرهود الكويت ويسرقون أجهزة مكيفات وسيارات كابريس وتلفزيونات واثاث ووو وتباع بفلسين ونهب منظم لكبار الدولة ونهب عشوائي للرعاع من الناس وتنتشر اغنية اله اترسك ياسكس على عناد امريكا .

11.اخر اسبوع العالم كلة يتوسل بصدام انسحب انسحب راح يدمر العراق وينمسح من الخارطة ما ضلت دولة ما سوت مبادرة ووساطة وتوسطت وتوسلت وارسلت وفود ومبعوث حتى امين عام الامم المتحدة خافيير دي كويلار جاء بنفسه لبغداد لم يستقبلة صدام وبقى كاعد بالقاعة القصر الجمهوري وحده لمدة عشر ساعات رفض صدام استقبالة بسابقة لم تحدث بالتاريخ وصدام يرفض ويتبجح والله حتى الامم المتحدة خلينا ينتظر ومحد استقبله .

12.صدام يزور الكويت ويعلن انه مستعد لام المعارك حتى لو طلعت بالتلفزيون اكول انسحب من الكويت لا تنسحبون وتلفزيون العراق يطلع اغاني حربية وبث تسجيلات برنامج حياكم الله لقاءات للجنود ويهوسون احنا البير احنا وكل طلقة بامريكي وكلنا فداك يابوعدي وياشعبنا اليعربي دنسوا قبر النبي و سيدي شكد انت رائع . وتنلاص الامور اكثر فاكثر .

13.اخر يوم وساعات من انتهاء المهلة فرنسا تتوسط الاردن تتوسط ممثل الاتحاد السوفيتي وممثل الاتحاد الأوروبي واليمن ويرفض صدام ويعلن لا استقبل اي مبعوث للتوسط .

14.رئيس امريكا بوش الاب يرسل رسالة لطارق عزيز وزير خارجية موجهه الى صدام بها نص اذا لم تنسحب يكلفك ذلك منصبك علنا .وصدام وطارق يبيعون براسنه قومجيات وتنظير فارغ ومزايدات وردح قومجي فارغ .

15.ليله 16-17 - كانون الثاني - 1991 يرسل حافظ اسد خطاب وحسني مبارك خطاب عوزهم ما يبكون على العراق يتوسلون ويطلبون تجنب الحرب يصدام انسحب .. ما ينفع يتجاهل صدام ويعلن انه ستكون ام المعارك .

16.ساعة 11 وربع وتشتعل تصير نهار و تصير جهنم وتنقطع الكهرباء لاول مرة مع الضربة الجوية و1000 ضربة وغارة كمعدل باليوم الواحد دك من الصبح لليل كل مدن العراق بصرة ناصرية عمارة كويت كوت عمارة سماوة ديوانية نجف كربلاء حلة بغداد رمادي ديالي تكريت كركوك موصل ودك 24 ساعة .

17.دمرت الوزارات كل المصانع المصافي الجسور ابار النفط المطارات محطات الكهرباء مخازن الأسلحة مخازن الاغذية القواعد العسكرية محطات المياه ابراج الاتصالات والبث الهاتف الارضي ملاجئ ضربات خاطئة سقطت في احياء سكنية استمر القصف 40 يوم متواصل دون اي انقطاع ...

18. نايم انت بالمتقدم بموضع بنص التراب والعنقودي والنابالم واليورانيوم يدك عليك دمار هائل هروب عشوائي لبعض القادة وترك الافراد هناك تحت العنقودي وصواريخ كروز مجنح وطائرات اف 15 و 16 .

19.صدام يسوي هجوم انتحاري على الخفجي وحفر الباطن استمر يومين وانتهى بتدمير وقتل واسر 90% من القوة المهاجمة ويعلن انتصار .

20ّيطلق صدام صواريخ يسرة على اسرائيل ويرسل 140 طائرة الى ايران ويتيه جو العراق والطيران الامريكي يسرح ويمرح يقصف ويرجع ويرجع يقصف .

21.صدام بعد خراب البصرة ينطي انسحاب ويحرق نفط الكويت و يقراه المذيع وماكو كهرباء محد سمعه ويهرب الجيش من الكويت عشوائيا لدرجة حوادث تصادم تحدث بطريق الموت طريق الغبدلي وتجي انت مشي والعنقودي يطش عليك جكليت عنقودي من الكويت للبصرة دك وصاير اسود من دخان النفط .

22.امريكا تطلق عملية عاصفة الصحراء باخر اسبوع من 40 يوم وتقتل 70 الف جندي وتاسر 80الف جندي عراقي مسكين ممن خدموا بحرب ايران وتدمر 5000 دبابة والالية ..

23ّ القوات الامريكية والحلفاء تجتاح بادية السماوة والبصرة وتوصل تقطع طربق ناصرية سماوة وتحتل قاعدة الامام علي الناصرية وقاعدة جليبة بالبصرة وام قصر .. ويكدرون يوصلون لبغداد لكن توقفوا .. بامر الرئيس الأميركي .

24.الطائرات الحربية الامريكية تقصف المنسحبين قصف لم يحصل بالتاريخ وتتفحم جثثتك داخل الاليات المحترقة .

25.تنتهي العملية ب 120 الف ضحية عراقي مدني وعسكري و 80 الف اسير و 200 الف جريح ومجاعة وكارثة انسانية .

26. صدام يوافق على اثنا عشر شرط الامريكي لوقف اطلاق النار ويرسل سلطان هاشم وقع عليهم بنعم وتم اقتياده كالاسير واسمته الصحف مستر يس .. لان كل ما يطرح

27.تتاسر او تتفحم وتتقطع اشلائك او تعوق او تهرب او يمسكوك الكويتيين او تتشبث على ظهر دبابة او عربة تصادفك تتشبث بها وصاير اسود من كاربون الحرائق وتوصل للبصرة وتمشي لمدينتك سيرا على الاقدام او بعربة او فوق سيارة تتوسل بي يوصلك بطريقة مسافة .

28.توصل لمدينتك لا اكل لا شرب لا فلوس الناس تتصدق عليك بخبزة وجهك اسود مشايف مي شعرك اشعث مغبر ورجليك مورمة من المشي ملابسك رثة ومن توصل تطلع امك واهلك ابوك ركض حفاي يبكون يحتضنوك بالشارع ممصدكين انت حي وما متت وكم من عوائل انتظرت كثيرا ولم ياتي ابنائها .

29.الناس تموت قهر من سياسة صدام وبشغلةىدخول الكويت والحروب وعدم الانسحاب والانسحاب والاستسلام والقصف وخراب العراق واحد الغاضبين يقوم باطلاق قذيفة بوجه بصورة صدام حسين بساحة سعد في البصرة كعلامة غضب وتبدا فورة انتقام من رموز نظام صدام وثورة جياع وانتفاضة غضب وملاحقة للبعثيين والامن وعمليات حرق وتخريب في 14 محافظة من اصل 18 .. تسقط بيد أهلها .

30.بوش يتراجع عن خطط اسقاط صدام ويقرر ابقائه في الحكم بمقابل تنفيذ كل شروط استسلام خيمة صفوان منها الاعتراف بالكويت وترسيم حدود ودفع تعويضات وتدمير اسلحة الدمار الشامل وفرق التفتيش وحكم ذاتي للاكراد و ومنطقة حظر طيران وقبول كافة قرارات الامم المتحدة ومجلس الامن بالعقوبات وقبلها صدام كلها .

31.صدام يعلن الانتصار بالمنازلة الكبرى ام المعارك واغاني واناشيد وصور وشعر وركص وتصفيق

نهاية الجزء الأول ...

30 نقطة الجزء الثاني لاحقا ..

#أحمد_السلامي