نظرا لانتشار البوستات اللي على الفيس اللي من نوع متجوزيش الا لما يفرحك ويخرجك ويفأجاك ويوديكي ويجيبك.. احب اقولك يا عزيزتي انك فالحالة دي اوعي تتجوزي، لانك ببساطة مش هتعيشي الحياة الاسطورة دي، اقولك تاني يمكن تفوقي، متجوزيش يا حببتي، لان الحياة مش عبارة عن فسح ودباديب وشيكولاتة،ويخرب بيت الاعلام والمجتمع اللي خلانا هايفين بالمنظر دا.

عزيزتي حببتي إليكي بهاريز تجربتي الشخصية أو خبراتي من صديقاتي والمجتمع المحيط:

-اتجوزيه أما تعرفي تستحملي عصبيته، وعايزة اقولك كلمة في سرك "مفيش راجل مش عصبي".

-اتجوزيه لو مستعدية تضحي بشهر عسل في المالالديف وتقضيها في اسكندرية، الحالة قحط والشباب مش لاقي، والطيارات يا بتتخطف يا بتقع فخفيه عليه شوية ربنا يهديكي.

-اتجوزيه لو بتفكري في حياتكوا انتوا الاتنين بس، بعيدًا عن بنت خالتك عملت فرحها فين، ولا صاحبتك الانتيم عملت ميك اب فرحها فين، هو كده كده عارف شكلك طول فترة الخطوبة، مش هيغير نظرته فيكي صدقيني يوم الفرح.

-اتجوزيه لما تقتنعي أن عيوبه هي أحسن ما يميزه، فكك من جو هيتغير بعد الجواز، وهغيره وهطبعه بطبعي، أحب اقولك مفيش حد بيتغير، إلا كنتي سمعتي كلام أمك كل يوم وهي بتصوت "رتبي سريرك أما تقومي".

-اتجوزيه لو خناقاتكوا بتقعد كام ساعة وتنتهي، وتتصلوا تصوتوا في ودن بعض، لو واحد سمعكوا هيفتكر أن دا آخر مكالمة بينكوا، وبعدين تتكلموا بعد ساعة ولا كأن في حاجة.

-اتجوزيه لو هتقدري تبطلي تعاتبي فيه، حببتي مفيش راجل بيعترف بغلطه في الأغلب، وخاصة لو اصريتي في وشه وقولتيه انت غلطان، كبري دماغك وهو من نفسه هيجي يعتذرلك.

-اتجوزيه أما تقتنعي أن الصور اللي مالية صفحات الفوتوجرافر دي حلوة عشان الكاميرا الحلوة، مش عشان هما حلوين بزيادة وضحكتهم من القلب، كلنا مهومين وحالتنا كرب اسمعي مني.

-اتجوزيه لما تقتنعي أن هو كده بشخصيته، وريحي دماغك مش هتلاقي زي أبوكي، عشان انت شايفة ابوكي احسن رجل في الدنيا عشان هو ابوكي مش عشان هو احسن راجل في الدنيا.

واخيرا يحضرني كلام عمنا "عمرو طاهر" "الجواز مش أنك تلاقي الشخص المناسب.. الجواز أنك تكون انت الشخص المناسب".