زهقان من الدنيا ؟

تعبت واتخنقت خلاص من المشاكل والهم ؟

طب وبعدين ... ح تفضل لحد امتى يائس وسايب نفسك للاكتئاب والحزن ومش عاوز تتحرك ؟

كل حاجة بتاخد وقتها بس خلاص كفاية كدا ، اخرج من اللي انت فيه ..

مقفلة ف وشك ؟ اعمل انت فيها ثقب ووسعه

الجأ لربنا وهي تفرج ..

ما سألتش نفسك .. مش يمكن تزايد الهموم والحالة اللي انت فيها دي عشان ربنا بيقفل قصادك كل الأبواب ويريدك تلجأ له هو بس ؟

ما هو بالمنطق كدا هو قفل ف وشك كل الأبواب ومافاضلش غير بابه .. مستني ايه بقى عشان تخش ؟

امشي انت اول خطوة وهو ح يشدك ويخليك تكمل ..

ماتسيبش حياتك فاضية وروتينية وتقول اهيه ايام وبنعيشها ..

انت جدد حياتك بنفسك .. دخل نفسك ف اهداف تانية غير شغلك وبيتك ..

شوف مشروع دعوي زي تفريغ الدروس وتنسيقها او تصميم البطاقات والموضوعات او اي حاجة من النت سهلة ومش مكلفة ..

خلصت تعليم ؟ ابدأ اتعلم حاجة تانية مفيدة بتحيها زي البرمجة او اللغة الانجليزية او اي حاجة تانية ، او معهد علوم شرعية او تحفيظ قرآن ..

السكك كتير والي ح يدور ح يلاقي واكتر من كدا كمان ، بس ماتبقاش سايب نفسك ف حالة اليأس والاكتئاب دي ومستنيها تعدي بمعجزة من السما !!

على فكرة .. مشاكلك وتعبك وهمك دا بسبب خلل ف علاقتك بربنا ، لأن علاقتك بربنا لو كويسه ح تنعكس على كل حياتك ..

عرفت المشكلة بقى فين ؟ حطيت ايدك عليها ؟ يالا ابدأ وماتستناش قبل ما الهم يموتك ببطء

حطم الاكتئاب والحزن .. ايوه انت تقدر عليه ، هي بس اول خطوة اللي بتبقى صعبة وتقيلة والباقي ح يبقى سهل ان شاء الله

بس انت ابدأ .. انوي .. ادعي ربنا يعينك ويساعدك ويخرجك من الحالة دي .. ما تستسلمش .. اسعد نفسك بنفسك وماتستناش السعادة تخبط على بابك ، دور انت عليها وح تلاقيها ، ح تلاقيها لما تبدأ تغير روتين حياتك وتبتكر حاجات جديدة ..

دا حتى ست البيت لو غيرت ف مظهرها شوية او ف روتين الأكل اللي بتعمله كل يوم او حتى غيرت ف ديكور الشقة ح تتظبط ونفسيتها ح تتغير وتبقى احسن

انت لسه ح تفكر ؟؟؟؟؟

#أميرةتوفيق