" سهل جدا مع اى لخبطة، نعيط و نلوم على الى حوالينا! بس الحياة مفهاش مكان للضحايا! الحياة مش ضحايا و أشرار، مفهاش مؤامرة كونية عليكى عشان تفشلى او تتنكدى! الحياة عبارة عن أختيارات و تحديات و دروس!

إنتى بتختارى.. فى علاقاتك باللى حواليكى، بنفسك، بمشاعرك و افكارك، بقرارتك و تصرفاتك.. إنتى بتختارى "

سيندريلا سيكريت

ص 252

الفقرة دى من أكثر الفقرات ال أثرت فيا فى الكتاب و غيرت فى حياتى، لأن فعلا الندم و كثر اللوم و العتاب مش بيغير اى حاجة فى الدنيا.. غير انه بيخلى الأنسان واقف مكانه مش بيتحرك بمعنى أوضح "بيشلك "

طول م أنت قاعد تندم على حظك و تشتكى ان ال فات ضيعك. و انت مش عارف تعمل حاجه و ان كل الطرق مسدوده و ان مفيش حد يساعدك و أن مفيش جديد و ان و ان ...... الخ

لو مشيت ع الوضع ده فأنت بتضيع عمرك فى اللاشئ و عمرك مهتعمل حاجه فى حياتك

إنما بقى...

لو بطلت تلوم الظروف و الناس و تندم على ال عدى من حياتك و تبدا تاخد خطوات فعلية تنفيذية.. زى مثلا!!

اولا:- توقف خالص تفكير فى ال خلص "اصله مش هيرجع و مش هتعرف تصلحه"

بس ممكن تتخطاه بأنك تحاول تنساه او تتجاهله على الأقل.

ثانيا:- أبدا خد خطوات تعديل..و تصليح لكل حاجه تعباك! او اى حاجه مش عارف تحققها!!

اجتهد و دور جواك على حلمك و شغفك.. اسعى فى اول خطوات توصلك لحلمك، مش هتوصل من اول مره.. بس حاول.. عاافر.. خد خطوات صغيرة لكل حاجة كبيرة فى حياتك

اسعى و اجتهد و التزم و هتلاقى ربك بيسرلك كل حاجه و بيسخرلك الكون كله لتحقيق هدفك.

ثالثا و الأهم:- تفاءل.. خليك واثق أنك تقدر تعمل ال نفسك فيه، تقدر توصل لحلمك و هدفك مهما كان ايه.. خليك واثق أن ربك مش هيضيع عباده

رابعا:- لو بتشتكى من تعامل او اسلوب حد معين معاك، جرب تغير أنت أسلوبك معاه يمكن العيب و التقصير منك انت، حتى لو فيه جرب تضحك و تهزر مش يمكن اسلوبه رد فعل على اسلوبك، اكيد هتلاقى فرق صدقنى " عن تجربة "

خامسا:- اشغل نفسك و وقتك بأى حاجه و كل حاجه تقدر تعملها، متسيبش وقت تفكر ف اى حاجه خلصت و انتهت.

الخطوات دى يمكن تكون قليلة.. لكن فعلا بتغير الطريق لهدفك و اسلوب حياتك.

لما عملت جزء منها او كلها تقريبا.. فرقت معايا جدا، وقتها فهمت يعنى ايه " انت تختار ".

انت ال بتختار تكون ضعيف و تشتكى همك بس و لا بتختار أنك تكون قوى و تعافر و تحارب لكل حلم بتحلمه و تدافع عنه.

وقتها عرفت يعنى ايه " السعادة قرار "

يعنى ايه لو أنت عايز تعيش السعادة هتعيشها ، و هتحمد ربنا عليها بل هتحسها فى ابسط الاشياء حواليك مثلا فى لون السماء و اشكال السحاب او فى نسمه الهواء البارد او فى رائحه القهوة و كلمات الكتب.. احمد ربك على كل شيء بسيط فى حياتك

نقطة التغير و التحول دى فيك أنت، و سر السعادة فى الرضا فكرة انك ترضى بكل شئ و كل ظرف حصل ده هيساعدك على تخطيه و لكن ايااااك و التأقلم

ايااك تتأقلم على الرضوخ للظروف.. فقط تحمل مسئولية حياتك.

فى النهاية:- الاختيار اختيارك.. هتختار ايه!

" الإنسان يستطيع أن يبدا حياته من جديد فى أى مرحلة من مراحله مستفيدا من دروس الألم و عثرات الطريق "

عبد الوهاب مطاوع

الله يراض قلبكوا ♡

E.M.M