يعنى ايه هجين؟ ببساطة خليط ما بين اتنين ماتور كهربا و ماتور احتراق داخلى بنزين أو ديزل.

فكرة العربيات الهجينة هى رفع أداء الماتور و توفير البنزين و تخفيف الانبعاثات فى المقام الأول .

الماتور البنزين ليه وظيفتين اساسيتين وهما انه بيحرك العربية وده العادى والوظيفة التانية انه بيولد طاقة حركة بتتحول لطاقة كهربائية بتتخزن فى بطاريات غالباً بتكون تحت الكراسي الخلفية أو فى شنطة العربية لتشغيل الماتور الكهربا.

والماتور الكهربا شغلته انه يشتغل مع الماتور البنزين أو من غيره بمعنى انك تقدر تشغل العربية وتمشى بيها عادى بالماتور الكهربا كأنك راكب بالظبط عربية كهربا.

طب المواتير دى بتشتغل ازاى؟

زى ما قولت كل ماتور بيشتغل على حده.

فى الاول لما تدور العربية اللى بيشتغل الماتور الكهربا وده حاجة حلوة جداً انت بتدور العربية وتمشى على طول لا بتسخن العربية ولا أى حاجة العربية أصلا ملهاش أى صوت لما تشغلها و العربية بتمشى عادى بالماتور الكهربا على السرعات المتوسطة لحد لما البطاريات دى تخلص شحن بيبدأ كمبيوتر العربية يحول الطاقة من الماتور الكهربا للماتور البنزين و العربية تتحول من عربية كهربا لعربية بنزين عادية و بيبدأ شغل الماتور البنزين.

طب احنا كده معملناش حاجة ورجعنا لأول نقطة هشحن الماتور الكهربا ازاى وفين؟

زى ما قولنا فى الاول الماتور البنزين بيولد طاقة حركة بتتحول لطاقة كهربائية بتتخزن فى آلاف البطاريات مصنوعة من الليثيوم هى اللى بتشحن أو بتشغل الماتور الكهربا و ممكن يتشحن من خلال دوستك على الفرامل.

طيب ، ينفع أشغل الماتور البنزين لوحده؟

ينفع ، من خلال الضغط معا على دواس البنزين و الفرامل أثناء التشغيل.

طيب انا عايز اشغلهم الاتنين مع بعض عشان أطلع كل القوة اللى فى الماتورين.

بشكل عام لو كنت ماشى بهدوء الماتور الكهربا هو اللى بيكون شغال وبياخد طاقته من البطاريات لكن لو حبيت تسرع الماتور البنزين بيشتغل مع الماتور الكهربا عشان يديك الأداء المطلوب واللى بيتحكم فى الأمور دى عدد من الكمبيوترات.

طب البطاريات دى بتبوظ؟

مش بالظبط ، البطاريات المستخدمة تعتبر بنت عم بطاريات الموبايلات عليها 10 سنين ضمان

معنى كده انها بتبوظ بعد 10 سنين؟

لا ، بس بعد 10 سنين بيبدأ أداء البطاريات يقل و بتتغير عادى بسعر مش كبير و عشان تحافظ عليها لأطول فترة ممكنة لازم تتأكد انها بتتبرد كويس من خلال الهوا وبيكون فيه فتحات توصل الهوا من جوه العربية للبطاريات فلازم تتأكد أن الفتحات دى مش مسدودة بحاجة أو من خلال سائل تبريد طبعاً غير سائل تبريد الماتور.

نيجى بقى للسؤال الأهم هى فعلا العربيات الهايبرد دى بتوفر فى البنزين؟!

تعالوا نحسبها

فى العربيات العادية بتحط بنزين 92 مثلا. تانك البنزين غالبا بيكون 55 لتر سعر اللتر 6.75 جنية

يعنى 371.25 جنية بتمشيك تقريباً 650 كيلو.

فى العربيات الهايبرد تانك البنزين بيكون 45 لتر غالباً يعنى التفويلة الكاملة ب 303.75 جنية بتمشيك 1000 كيلو يعنى نسبة التوفير 35% بس التوفير الكبير ده فى حالة ان اغلب ماشيك على السرعات تحت 50 كم/س لأن الماتور الكهربا على السرعات دى هو اللى بيكون شغال فالتالى بيحقق أفضل توفير لاستهلاك البنزين.

وهكذا على باقى العملات الأخرى.