آ فْلانْ منْ شي ناسْ و الزّْمانْ عفاكْ ردْ البالْ

انقصْ هضْرهْ وْ قيلكْ مْنَ القيلْ والقالْ
لا تْزيدْ ف كْلامْ وْ خلّي السوقْ ما انْت دّلالْ
انْفضْ يدّيكْ يلا الصّحبةْ مَ بْغاتْ غسّالْ
سافرْ خْفيفْ و ثّْقلْ خلّيهْ لْ سيدي رحّالْ
لا دْخُلْ فمْرايةْ خلّي المثْلةْ فْ عَنْقْ لَ بْغالْ 

آ فْلانْ مَنْ شي ناسْ و الزّْمانْ عفاكْ ردْ البالْ

ارْبطْ ظلّكْ و فمْنازْلكْ كُنْ شْبيهْ لَهْلالْ
احْضِ جْلايْلكْ مَنْ خلْطةْ رضْعَتْ لَهْبالْ
ارْضِ ناسكْ و الجّارْ يّاكْ تْآذيهْ ب افْعالْ
اكْتمْ صْوالْحكْ شْحالْ مَنْ واحدْ عْل سرّكْ عوّالْ
خفّضْ صوتكْ بنْهيقْ لحْميرْ .. رجّاتْ لجْبالْ 

آ فْلانْ مَنْ شي ناسْ و زمانْ عفاكْ ردْ البالْ

لا دّيرْ ديبْ تحتْ القفّةْ
خصْلة تَدْحيكْ من صفْ الرّْجالْ
لا دّيرْ مَنْ الحبّةْ قبّةْ
صنْعة خلاّتْ لبْهوتْ تْفيّقْ لَغْيالْ
لا دّيرْ مْنَ السبّة موّالْ
غنْية مْحفّرْ ة مَنْ هذي شْحالْ
لا دّيرْ مْنَ الرزّة تاجْ الْبسْ ما يْواتيكْ هو عزْ لفْصالْ

آ فْلانْ مَنْ شي ناسْ و الزّْمانْ عفاكْ ردْ البالْ

بقلم : تاج نورالدين .