تعليم زمان
حسن غريب
أيام ما كنت في المدرسة زمان، كان الفصل الواحد في طلاب من كل المستويات تقريبا، اللي كان قاعد جنبي أبوه دكتور، وأنا أبويا كان ضابط في حرس الحدود ، وكان ورايا واحد أبوه جزار، والتاني أبوه تاجر، وفي اللي أبوه ظابط، واللي أبوه صحفي.
المهم كنا كلنا قاعدين في نفس المكان باختلاف مستويات أهالينا.
بنتعلم في نفس المكان، كلنا زملاء وأصدقاء، مكانش في فروق طبقية زي اللي حاصل دلوقتي.
من بعد موضوع المدارس الانترناشيونال، والمدارس الأمريكية والبريطانية والألمانية واليابانية، والدارس الخاصة والتجريبية والأزهرية، بدأت المستويات والعقليات وطريقة التعليم تتفاوت.
الأمر الي اتسبب في فروق طبقية كبيرة، وبقى في تصنيفات للبشر حتى في طلبات التوظيف، الشركات بتطلب دلوقتي خريجي مدارس أجنبية وغيره.
الوضع ده عمل خلل كبير في المجتمع، بقى في ناس عايشة في مكان بعقلية وطريقة وثقافة، وناس تانية عايشين بطريقة مختلفة وفكر مختلف وثقافة مختلفة.
اتحول الأمر لجيتوهات منعزلة، ساكني المناطق الشعبية، ساكني المناطق الجديدة، قاطني الكومباوندات، ساكني مناطق الأغنيا القديمة زي مصر الجديدة والزمالك وجاردن سيتي.
وتصنيفات التعليم العالي من أقسام الكليات عربي وانجليزي وفرنسي، جامعات حكومية وخاصة.
وجامعات تابعة لدول زي الجامعة الأمريكية والكندية والروسية والألمانية.
وأصبحت كل مجموعة منعزلة عن المجموعات الأخرى، وبقى كل واحد عايز الباقي يعيش يطريقته وعلى مزاجه، أو يعيش بعيد عنه، ودلوقتي ناس معترضة على ناس بتروح الساحل الشمالي وشرم الشيخ.
وناس معترضة على دخول ناس من طبقات أقل للكافيهات والمطاعم اللي بيرحوها، والموضوع قلب بعبث طبقي كبير قلب بهبل وبقى في أحقاد وبلاوي، والموضوع تحول لنار تحت الرماد، ممكن تؤدي لكارثة في أي وقت.
في كل مكان في الدنيا تفاوت طبقي طبيعي بين الناس، ولكن في أساسيات، كلهم بيتعلموا زي بعض، بيتعالجوا في أماكن بنفس المستوى، بيدخلوا أي مكان طالما يقدر يدفع أيا كان مستواه.
انما الحاصل عندنا حاليا أقل شيء يتوصف بيه انه مهزلة في غاية السوء، مهزلة وعبث مضاعف وخلل ثقافي واجتماعي رهيب.
"مبدأ التدافع" اللي يعطي الفرصة لابن الجزار يصبح مهندس او استاذ جامعة ولا يعطي مزايا اضافية لابن الطبيب الفاشل كي يرث مهنة أبيه هو ظاهرة صحية في المجتمعات والدول ، اللي بيحصل الان اننا بتصنع كانتونات طبقية تمنع الترقي الاجتماعي لشخص ذو مؤهلات وتدفنه محل أبوه وجده !
حسن غريب
-
حسن غريبعضو اتحاد كتاب مصر كاتب.. ناقد.. روائي.. شاعر