العانس
حسن غريب
مفيش واحدة إسمها عانس .. وإن كان ده لقب بيطلق على اللي فاته ما يسمي بقطر الجواز يبقى ينفع بقى إني أقول إن فيه راجل عانس برضه
طب هو يعني إيه وقت الجواز ؟ هو الجواز له وقت أو توقيت لو الانسان متجوزش فيه يبقى كده خلاص القطر فات والحجز خلص ومفيش تذاكر تاني
مفيش حاجة إسمها عانس .. فيه واحدة إسمها ملقتش الشريك المناسب .. ولسه بتدور عليه لحد ما تلاقيه وتحصل الشراكة .. هو لو حضرتك عاوز تفتح مشروع مع فارق التشبيه المادي بين فكرة الجواز والمشاريع ولكن هنفترض إنك عاوز تفتح مشروع ومحتاج شريك متخصص في المجال و معاه مليون جنيه .. هل ينفع إنك تقبل بأي شريك ملوش علاقة بالمجال لمجرد انه بيملك الفلوس اللي إنت طالبها ؟ أكيد لا ولو حصل يبقى المشروع في نهايته هيفشل لا محالة
العنوسة مصطلح وهم إخترعناه عشان نقلل من ولاد الناس ونرعب البنات بحيث يختاروا أي حاجة لمجرد إنهم ميتقالش عليهم عانس .. ضريبة بتدفعها البنت للمجتمع في حين إن الراجل مهما كبر مبيتقالش عليه عانس وده خلل في الميزان هدفه خبيث
البنت المفروض متتجوزش إلا لما تلاقي الراجل المناسب مهما طالت المدة .. لأنها حياة .. حد هيكمل معاها عمرها كله .. يا أخي ده اللي بيدور على مطعم ياكل منه بياخد وقت ما بالك بواحدة هتتجوز وتبني بيت وولاد وحياة
٧٠٪ من حالات محاكم الأسرة سببها الضغط النفسي على البنت في اختيار الزوج .. يا بنتي ده رابع واحد ترفضيه .. طب وإيه يعني ؟ رابع ولا خامس ولا ١٠٠ .. حقها إنها تختار وتدور وترتاح لحد ما تقرر من جواها عن قناعة ان هو ده اللي هقدر اكمل معاه حياتي
البنت مش محطة .. مش مجرد كائن إتولد واقف مستني اللي هياخدها لمرحلة التزاوج.. البنت في حياتها محطات كتير وأهداف وطموح وولع وشغف وحياة ..والجواز وإن كان هدف إلا إنه محتاج الوقت الكافي والاختيار عن قناعة تامة بدون ضغوط ولا مؤثرات خارجية .. حتى لو بقى عندها ١٠٠ سنة طالما ملقتش الشريك اللي ترتاح معاه ويصونها وتكمل معاه عمرها بدون خوف أو قلق يبقى بلاه المشروع ده خالص طالما هيخسرها نفسها وحياتها وحلمها.
حسن غريب
-
حسن غريبعضو اتحاد كتاب مصر كاتب.. ناقد.. روائي.. شاعر