حبيت أتمشى فى الشارع شويه أفكر كـ محاوله لأنى أخطط لشئ ما أنا نفسى معرفوش ، فجأه لقيت بوسترات من كل اتجاه و كأنى وقعت فى مجله ، لفت نظرى إن كل البوسترات مكتوب فيها فلان يؤيد السيسى لفتره رئاسيه جديده .. إيه ده ! هو فى انتخابات أصلٱ ؟!
استغربت جدٱ من كم التأييد بس اكتشفت بعدها إن معظم البانرات دى كانت إجبارى على أصحابها إنهم يعملوها زى إتاوه كده .. ما علينا مش موضوعنا خالص يعنى .
المهم قولت لنفسى يا ترى إيه الاسباب اللى تخلينى كـ شاب فى ربيع عمره زى ما بيقولوا انتخب السيسى ؟!
و الصراحه لقيت أسباب كتير ماشاء الله ..  طب زى إيه ؟!
زى مثلٱ إن على ايديه مصر أخدت المركز الاول بسم الله ماشاء الله فى جريمه الإختفاء القسرى ، لحد دلوقت متسجل 760 حاله إختفاء قسرى بس .
زى إن التعليم المصرى هوب اتطرد من الترتيب العالمى للتعليم ، بمعنى إن كل اللى هندرسه نبله و نشرب مايته و الشهاده بتاعتنا مش معترف بيها بره أى دوله غير مصر ده فى حاله لو مصر أصلٱ معترفه بتعليمها لينا و مبتطلبش جنب أى شهاده كورسات و خبره من خريجين جداد ، أو مثلٱ التزوير فى التاريخ اللى بيدرسوه للطلبه و الجغرافيا كمان 😉
و بمناسبه الجغرافيا ، أنتخبه عشان يبيع حته كمان من أرضى و المره دى الله أعلم لمين ، و اصدر قوانين بشرعيه تملك بعض الكويتين لاراضى مصريه ، باع تيران و صنافير و فوقهم خسرنا القضاء المصرى .
أفكر أنتخبه عشان يوم ما فكروا يبقى فى لجنه حقوق إنسان فى مصر كان رئيس اللجنه علاء عابد اللى هو فى الاساس عليه قضايا تعذيب مثلٱ 😂
و لا ممكن أفكر أنتخبه بسبب المشاريع الكتير جدٱ اللى عملها للبلد ، هي صحيح كلها مشاريع فاشله بس كتير ماشاء الله ، حقيقى بيعجبنى فيه تصميمه على تنفيذ أى مشروع يطلع فى دماغه ، مشروع تفريعه قناه السويس جمع 60 مليار جنيه فى تفريعه كل الدراسات كانت بتقول إنها خسرانه و نتج من المشروع إيه غير تعويم الجنيه ، كان ممكن يعمل بال 60 مليار اصلاحات تخلينى مكتبش حرف دلوقت ، زى اعاده تمويل المستشفيات الحكوميه اللى الاجهزه فيها تكاد معدومه من قله فايدتها ، و تتصرف فى التعليم نزود مدارس حكوميه بدل الفصول اللى وصل عدد الطلاب فيها ل 120طالب فى الفصل ، و مشروع فاشل تانى زى حقل ظُهر اللى عمله و اتكلف مليارات و قال احنا كده خلاص مش هنستورد غاز تانى و ازمه الغاز اتحلت و احنا اللى هنصدر بعد كده و كلام ووعود وهميه ، و هوب خبر استيراد الغاز فى بدايه 2018 ب 10 مليار و من اسرائيل 😄 معاهده سلام يا جدع و صباح الفل بقى ، يعنى زى ما بيقولوا أحلى تطبيع ده و لا إيه ؟! ، و مشاريع فنكوش كتير و لعب بعقول الغلابه أكتر .
يمكن يكون سبب مقنع بالنسبالى إنى أنتخبك بسبب إن ماشاء الله الفلوس معاك بتزيد من 34 مليار دولار ل 80 مليار دولار ، أينعم هما زياده ديون 😄 بس هنعتبرها زياده و خلاص ، مش هنركز خالص دى حاجه بسيطه يعنى ، هو انت دافع حاجه من جيبك انت بتاخد بس فى جيبك ، الشعب هو اللى بيسد ، أو ممكن عشان العقليه الاقصتاديه الفازه الانانيه اللى خلته يطلب قرض ب 12 مليار دولار من صندوق النقد الدولى و كان من شروط الحصول على القرض رفع الدعم من على الشعب و بالفعل أخد القرض و احنا اخدنا ✋
طب بلاش الفلوس ، الماديات بردو مش كل حاجه ، أهم حاجه الاخلاق ، ماشاء الله عندنا فريق اعلامى متوجه بالمسطره ، أدب إيه و أخلاق إيه حاجه يعنى أخر سفاله و تطبيل و كلام تانى مش عاوزه أقوله و الله ، إعلام متسستم كل يوم إنه يصحى ينفخ فى صوره الريس و يشتم و يخون فى أى حد بيحاول يعارض ، فـأنا كده كشاب مصرى لما ألاقى التعتيم على أى حق و التضليل هحب الاعلام جدٱ فعلا ، لما ألاقى الصحفيين و المصوريين بقى بيتقبض عليهم هصقف للنظام و أقول برافو ، حقيقى شابوه يوسف الشريف 👏
 طب عشان مبقاش باجى على الريس بس ، ممكن انزل أشارك فى الانتخابات دى و ليا حريه الاختيار ،بس يا ترى ممكن أختار مين ؟! شفيق مثلا اللى بمجرد ما أعلن إنه هيترشح اختفى و الامارات رحلته لمصر و بعدها طلع ببيان رجع عن قراره لظروف طبعٱ احنا منعرفهاش " احنا عارفينها على فكره " ، أو ممكن أرشح أحمد قنصوه أهو من الجيش زيكوا أهو بس ده اتقبض عليه بردو عشان سبحان الله أعلن عن نيه ترشحه للرئاسه و هو مرتدى الزى العسكرى ، لا القوانين قوانين يا جماعه على أى حد الا طبعٱ واحد بس كده كان أعلن بردو من خمس سنين نيه ترشحه بنفس ذات الزى العسكرى ، بس نقول إيه بقى بخوت يا قنصوه ، يبقى عليا و على المشير سامى عنان يوووووووه نسيت ده كمان اختفى قسريٱ و الجيش طلع قرار إنه مزور أوراق و بلاوى كتير كده ، يلا مالوش نصيب ، طب ما أنا كده مفيش قدامى غير كومبارس مترشح فى الانتخابات بيأيد السيسى لفتره رئاسيه تانيه .
حرام .. بجد حرام ، احنا فى مهزله تاريخيه و العالم كله بيبص علينا و بيضحك على هبل الحياه السياسيه اللى هيا مش موجوده أساسٱ ، لكل ظلم أخر و الله ، بس إحنا كشباب جبنا أخرنا من السكات و الفرجه على هبلكوا و أفكاركوا اللى مفيش فيها أى كرياتيف حتى ، طبعٱ بعد ما فكرت فى شويه نقط فى بحر انجازات فشل الريس لقيت إن مفيش سبب يخلى أى حد ينتخبه إلا لو كان مغفل .