نصب مكاتب الزواج

حسن غريب

كل يوم التقي به ، ألقي التحية فيرد عليَّ بوجهه البشوش ، والبسمة لا تفارق وجهه ، لكن هذه المرة وجدته حزيناً مهموماً مكفهر الوجه ، عاقد الحاجبين ، فسألته ما بك أخي وزميلي العزيز ، ماذا دهاك ، لم أعتد عليك وما عاهدتك من قبل علي هذا الحال .

فقال لي :" اسكت ، على ما جرالي , وليتني سمعت كلامك ، بدلاً من الجري وراء السراب ".

فقلت له : ماذا حدث يا أخي فقال ، وهو يزمجر ويتمتم بكلام غير مفهوم ، مصحوبة من نفخة من شفاهه طويلة ، فقلت له : أستغفر الله زميلي المحترم ، فاستغفر ربه ، ثم أردف قائلاً : الذي حصل معي لا يسر عدو ولا حبيب ، لكن سأقوله لك وأرجو نشره مع ذكر أسمي حتى لا أكون سخرية للشامتين والكارهين ، فأومأت له بالموافقة على ذلك .

فتكلم ، بصوت منخفض كأنه لا يريد الحديث ، لكن بدأ يسرد ماحدث ، وهو مطأطئ الرأس .

" الذي حصل ، إني كما تعلم مطلق ، لي عدة سنوات ، وقد علمت من خلال قنوات التليفزيون ، ومواقع التواصل الاجتماعي أن هناك مكاتب للزواج حسب الطلب والمواصفات ، فقررت أن أنشر خبراً علي قنوات تليفزيونية وعلى مواقع النت برغبتي في الزواج من مطلقة أو أرملة تكون جادة وتتقي الله فيَّ ، وبعد نشر الطلب أنهالت عليَّ مكالمات هاتفية ، ومن عبر الأنترنت ، مكالمات كثيرة ، ما بين سيدة ترغب في الزواج ، بشروطها وهو شرط لن ولم أقبله ، أن تتزوج عرفي ،وهناك من تريد أن تنشئ علاقة حميمية محرمة بدون زواج مقابل مادي ، وهناك شواذ من الرجال .

فقررت أن أنسى هذا الطلب نهائياً ، وأسعى للبحث هنا في مدينتي التي أعمل بها ، وظللت أبحث عن سيدة فترة ، لكن المشكلة أنني مطلق ، ومعي أولاد تعيش مع مطلقتي ، وتأخذ نفقة لهم ، وكل من تعرف ذلك ، تضع شروطاً قاسية . فقررت

أن أنسى الأمر وأقضي بقية حياتي هكذا .

ومن أسبوع تقريباً ، وجدت رقم غريب يرن على هاتفي ، وبالرغم لا أرد على أرقام لا أعرفها ، إلا أنني قررت الرد بعدما رن عليَّ الهاتف تكراراً ومراراً ، وكان المتحدث شخص يدعى :خالد سيد يحمل رقم ‏‪0112 230 5934‬‏ ، ولما رديت عليه دار الحوار التالي :

_مساء الخير يا فندم .

_أهلا مساء النور ، مين معايا ؟

_خالد سيد مدير مكتب للزواج بالمريوطية بالجيزة يافندم .

_خير حضرتك إيه المطلوب مني دلوقتي ؟

_حضرتك كنت منزل مواقع الزواج رقمك وسنك وطالب تتزوج من واحدة تتقي الله وتعيش معاك بما يرضي الله وتراعي ظروفك .

_أنا خلاص مش عايز وغيرت رأيي شكرا ؟

_ليه يا أفندم دي إنسانة ومحترمة وعاوزة تعيش .

_ لأني معظم اللي عرفتهم مش صادقين وعاوزين جواز يا انا عرفي أو العصمة في أيديهم أو بدون زواج مقابل مادي .

_ لا لا أستغفر الله ، أنا مكتبي مفيش الكلام ده ، وبنزوج لوجه الله بدون مقابل ، ؟

_إزاي بدون مقابل أمال أنت فاتح مكتب ليه ؟

_ لا يا فندم بناخد بس دي ظروفها وحالتها مينفعش ناخد منها ، عشان جارتنا وانا صاحب قريبها وهو بيدور على حد محترم يتجوزها ويسترها لأنها يتيمة وعمها وعمها طمعان في حتة الأرض اللي مكتوبة باسمها والشقة بتاعتها اللي في المنيب ، وطبعا عايز يجوزها لابنه اللي متجوز تلاته على ذمته، عشان ياخد منها حتت الأرض ، وهي عشان مطلقه مينفعش تعيش لوحدها في شقة المنيب ، فلازم راجل يكون متجوزها ، وبسرعه لأن خالتها عملالها مشاكل وبتاخد منها فلوس عشان قاعده معاها وطلبتها مبتخلص .

_وبعدين .

_حضرتك هبعتلك صورتها ، وبعدين هديلك رقم قريبها عشان تتواصل معاه ، وهو هيديلك رقمها عشان تتكلم معاها وتتعرفوا على بعض ، ماشي يا فندم ، بس عايزين نخلص الموضوع بسرعة عشان هى متبهدلة عند خالتها ، فبعد أما تتقابلوا ويكون فيه قبول ، هتتغدوا وتشربوا ساقع ، وفيه جنب المكتب صور فورية وهنكتب الكتاب ، ومش عايز للحالة دي حاجه .

_ففكرت بصراحة وقلت شقة في المنيب وأرض ، فقلت دي فرصة ، فوافقت .

_فقال لي خد رقم واحد اسمه أبو أنس ، ومكتوب على التريكولر خالد السيد ، واتفق معاه ، وبعدين هيديك رقمها تتكلم معاها ، وياريت حضرتك تبعت صورتك ، عشان تشوفك الأول على الماسنجر أو الواتس ، ده رقم أبو أنس أو خالد السيد في المريوطية ، الرقم هو ‏‪0115 034 6438‬‏ .

_ فأخدت الرقم ، وقلت له ، لو سمحت أشوف صورتها قبل ما أتصل ، وفعلا بعت لي صورة واحدة شكلها أول مرة أشوفه وجديد عليَّ ، وبعدها بعت له صورتي .

المهم أتصلت ، بأبو أنس وقال لي نفس الحوار والأسطوانة بتاعت اللي اسمه خالد ، وبعدين سيبني الأول أكلمها وبعدين اديلك الرقم ، وحضرتك هيبقى عندك شقة تقعد معاها فيها وعندها أرض بتاعتها وعاوزين نتفق ونخلص ، فقلت له ، لما أكلمها الأول ونتفق وبعدين نتقابل فقال لي ماشي .

بعد ساعة لاقيت باعت لي رقم على الواتس وبيقولي ده رقم أسماء أحمد واللي متسجل ع التريكولر بنفس الاسم ,المهم اسمها أسماء أحمد ورقمها هو ‏‪0115 293 4397‬‏ ، وقال لي بعد أما تكلمها قولي رأيك إيه ..؟

فقلت له خلاص ماشي .

ولما اتصلت بيها بتكرر نفس اسطوانة وسيناريو خالد وأبو أنس ، وقالت لي أنا ارتحت لك وخلاص راضية بيك وموافقة عليك ، المهم تيجي بسرعه عشان نكتب الكتاب وتعيش معايا في شقتي بالمنيب وهي نضيفة وجميلة .

وقالت أنا تمللي قافله التليفون عشان خالتي متاخدش بالها وتعمل لي مشاكل .

فقلت لها ماشي ، يومين كده هحضر نفسي وأنزلك ، فقالت لو طولت مينفعش لازم بسرعة عشان خالتي عايزة تجوزني لواحد قريبي خمورجي ووحش ، فقالت لها حاضر .

وبعد يومين من مكالمات قصيرة عرفت انها حجت وعملت عمرة ، وبتاعت ربنا .

لكن جالي تليفون من أبو أنس قال لي دلوقتي لازم يتكتب الكتاب وعشان يتكتب الكتاب عاوز فلوس ، ولازم تجيب لها دبله ومحبس أو خاتم ، فأنت هيبقى معاك كام كده ، فرديت عليه ، والله يابني الظروف معايا متسمحش بمبلغ كبير لكن هدبر مبلغ على أد حالي ، فقال لي أبقى اتفق انت وهي علي كده .

وبعدها رنت عليَّ وقالت ليَّ يا ريت لما تيجي تجيب معاك شنطتك فيها لبسك وهدومك عشان هتقعد معايا اسبوعين فقدم على أجازة ، وبعدين قالت هو أنت لازم قدامهم عشان الإحراج هتقدر تجيب معاك فلوس أد إيه فقلت لها اللي اقدر عليه وهستلفوا 4000 ج فقالت مش هينفع بس هقولك اول ما تقابلني هات المبلغ ولما تسألك أم أنس قولها 6000ج وانا هكمل عليهم ، فقلت لها ماشي اتفقنا .

وبعد يومين جهزت شنطتي بهدومي وملابسي ، وكلمتها وقلت لها أنا هبات في الشرقية ، وتاني يوم هركب القطر الصبح بدري واجيلك على المريوطية ، وفعلا حصل وعملت اللي قلته ، ركبت وروحت ليها ، فقالت اول مرة انا واقفه مستنياك قدام محل كشري اسمه العريس ، وبعدها بشوية قالت قابلني قدام الكوبري القريب من كشري العريس ، ورجعت بعدها بشوية غيرت رأيها ، فقالت قابلني في كافيه روما هو قريب من المنطقة .

المهم لما نزلت من الميكروباص ، فأول انطباع برن عليها لاقيتها بترد وتقولي انا واقفه مع أم أنس فلاحظت أن مش هي صاحبة الصورة اللي بعتهاللي خالد اللي فاتح مكتب الزواج ،شكلها مختلف ، فقربت منها وقلت لها هو انت اسماء قالت ايوه فقلت لها متاكده فقالت ايوه ياعم هو فيه ايه ، فروحت فاتح الموبايل وجبت على الصورة وقلت لها بس دي مش شكلك خالص ، فقالت خلاص براحتك كل شئ نصيب ، فعشان تبين وتكمل الفيلم المحروق قالت أم أنس اللي معاها بالزمة مش دي احلى من اللي في الصورة فقلت لها احلى ولا اوحش دي مش صاحبة الصورة ، المسألة مسألة مبدأ ، فقالت والله انا احلى من اللي في الصورة ، المهم صدقت كلامها مع اني كنت حاسس ان فيه حاجه غير طبيعيه وفيه نصابيا بتتعمل عليا بس البنت او الست حلوة شكلا وجسمها حلو زي غصن البان .

فقلت لها طب تعالى نتغدا أو نشرب حاجه وبعدين نتكلم ، فقالت انت جبت الفلوس ولا ايه دنيتك ، فقلت لها الراجل كان هيبعتها بس حصلت مشكلة مع ابنه واخدها منه وقال لي استنى لبعد العصر وهبعت لك نص المبلغ يعني الفين جنيه ، فوشها قلب الوان وقالت ازاي احنا اتفقنا على أربع آلاف فقلت لها وايه المشكلة هو كتب الكتاب هيكلف كام والدبلة والمحبس هيكلفوا كام وانت قولتي هتكملي عليهم ايه المشكلة ، فقعدت تزوم ومش عاجبها ، وبعدين قالت خلاص انت شايف كافيه روما ده اقعد فيه لغاية لما زميلك يحولك المبلغ ابقى اتصل بيا اجيلك عشان انا كنت مش عايزة ارجع تاني لخالتي ولمشاكلها وطلبتها وكمان أم أنس معاها طفل صغير مينفعش تقعد وتسيبوا ، بعدها روحت اتغديت في كشري العريس وبعدها قعدت في كافيه روما وقعدت افكر وعقلي قاعد يجبني ويوديني ومش عارف اشرب شاي وقهوة وانسى الموضوع ده وخلاص ولا اسحب 2000ج واقول لها ده المبلغ اللي معايا ، لكن ربنا عاوز يبعت لي رسالة مفادها اللي تعرفوا كويس احسن من اللي متعرفوش ، ورنت عليا كذا مرة تسألني عن الفلوس صاحبي حولها ولا لسه ، وبعد العصر قلت لها صاحبي حول المبلغ ، وبعدها جت متأخره على أدان المغرب ولما جت قالت لي يلا نمشي على المنيب عشان نكتب الكتاب فقلت لها انتظري قدام الجامع لما اصلي المغرب فقالت بعدين الصلاة فقلت لها مش ممكن لازم اصلي في المسجد جماعه فقوقفت على مضض ومن غير نفس لغاية أما صليت المغرب وخرجت فلاقيتها اخدتني على جنب وقالت لي فين الفلوس , عشان نخلص ، واخدت منى الفلوس وقعدت تعد فيها وشكلها اتغير وبقت فرحانه وقالت دلوقتي هات شنطتك وتعالى نركب انا وانت وام انس التوك توك ونروح نجيب علية شيكولاته ودستة جاتوه وساقع نوزعه بعد كتب الكتاب ، وحتى سواق التوك توك كان متفق معاهم على النصابيا والاحتيال ده ، شاورت أسواق التوك توك وقالت له :خليك معانا هنجيب طلبات وبعدها هنحسبك ، وفعلا لف معانا سواق التوك توك مرة تجيب طلبات ومرة تطلب نصور البطاقة صورتين عشان ياخدها المأذون ، وجت طلبت من سواق التو توك يودينا لأي صيدلية عشان اشترى حبوب منشطة جنسيا ،والعجيبة كانت راكبه في التوك توك منزلتش الا لما اشترينا الساقع والشبكولاته بس ولما جيت اروح الصيدلايه ما تسيب الموبايل معايا فقلت لها مينفعش ممكن حد يرن عليا ، فطبعا اخدت ال 2000ج ومعاها الشنطة بتاعتي ، ولما روحت الصيدلية عشان اجيب الحبوب المنشطة جنسيا ، فقعدت هي والنصابة الحرامية اللي معاها في التوك توك فقلت لها تعالي معايا فقالت لا روح انت ومطولش ، فروحت مفيش دقيقة ،اخدت من الصيدلية الحبوب ورجعت التوك توك ، لاقيته مختفي وفص ملح وداب ، جيت ارن على رقمها قعدت تكنسل وبعدين أغلقت الخط ، رنيت على النصاب الوسخ أبو أنس اللي اسمه متسجل على التريكولر خالد السيد لاقيته مغلق ، ورنيت على النصاب القذر اللي ربطني بالناس دي صاحب مكتب النصب والاحتيال للزواج خالد سيد فرد وبيقولي حصل ايه فقلت له على اللي حصل فقال لي هو انت اديت لها كام فقلت له هو اللي يهمك اديتها عشان انت نصاب وحرامي معاهم وهتتقسموا السرقة ،فراح قافل في وشي الخط .

وروحت قسم المريوطية وقدمت بلاغ ، واللي فتح لي المحضر كان ظابط محترم وقال لي احمد ربك أنهم محطوش ليك منوم وموتوك أو اتبلت عليك بأي حاجه، وطلع صور للمشبوهين ووراني صور كتيرة طبعا البنت هي واللي معاها عرفتها لكن اللي اسمه خالد وأبو أنس معرفتهمش عشان مشفتهمش قبل كده وكان المفروض نتقابل في مكتب الزواج عند النصاب خالد سيد ، ولما شاورت له على صورت البنت اللي اسمها أسماء أحمد والتانية أم أنس ووراني صورة صاحب التوك توك فقعد يضحك الضابط فقلت له هو فيه ايه يا باشا فقال لي عشان دول مسجلين خطر ومعمول ليهم قضايا دعارة وتلبس كذا مرة .

فقعدت اضحك جامد مع الضابط لغاية اما عيوني نزلت دموع من الضحك ، وكررلي تاني احمد ربك انك خلعت منهم .

وسيب الباقي علينا ، واحنا هتعرف نجبهم وهنتصل بيك إن شاء الله قبلها بيوم عشان تتعرف على شكلهم ونحولهم للنيابة .

شوفت انا ليه مخنوق ومضايق وزعلان فقلت له هون واحمد ربك انك نجيت منهم اللي مايعرفوش ربنا ، وحقك هيجيلك ربنا هينتقم لك منهم شر انتقام وهيتعقبوا بالقانون .

هذا هو النصب والاحتيال على أصوله ، من وراء مكاتب الزواج وما يحدث فيها ، لابد من رقابة مشددة من الأمن والشرطة ليعاقب كل نصاب وكذاب وخارج على القانون وكل من يببع الوهم للناس الغلابة والبسطاء ، والذي حلمهم أن يتزوج ويعيش في هدوء ، ولا حول ولا قوة إلا بالله .