" ماتعرفوش حد كداب "
المثل المصري بيقول : " الكدب مالوش رجلين "، بس انا مصدقة اكتر المثل الألماني:
Lügen haben kurze Beine!
لأن في كدبة بتمشي علي رجلها وتيجي لحد عندك ومن غير ما تفتش عنها... عشان كده: ماتعرفوش حد كداب!
" انا اتقبلك ناقصا ولكن لا اتقبلك كاذبا":
في العلاقات الاجتماعية صعب تستمر مع شخص كداب، مش هتقدر تتمسك به ولا تصلح منه ولا تلومه. أنت حتي مش هتقدر تسأل الكداب ليه كدب… لأنه اكيد👌 هيرد بكدبة جديدة.
انك تعرف صديق كداب، جار كداب، زميل كداب أو تعيش مع واحد كداب انت معرض للاستغفال طول الوقت.
✔ الكدب مش مرض ده آفة يمكن التخلص منها لو صاحبها انسان سوي، دي قضيته لكن قضيتك انت اذاي🤔 تتعامل مع
آفة اللسان... الكذب؟
❌ مش هتقدر تغمض عنيك🙈 كتير ، يمكن تعذره… يمكن تصبر… يمكن تعديله كام مرة… يمكن تقلل احتكاكك به… بس في النهاية مش هتقدر لو انت انسان صادق ومش بتحب الكدب ذيي، وبيوصلك بكدبه للشعور بالقرف.
هتلاقي نفسك قبل ما تعدي اول كدبة الثانية بتنكشف وقبل ما تعاتب وتلوم الثالثة بتبان.
كنت في حوار مع صديقة غالية علي قلبي وبنتكلم في امتي الظروف بتجبرني أبعد أو اتغير ناحية إنسان، وقالت بعفوية شديدة : لما يكدب عليا. وعندها حق 👍
👎 ماينفعش تعرف حد كداب وماينفعش تتعامل معاه خلاص و #تجنبه_حق_شرعي مكفول لك!.
ليه🤔🤔🤔؟
✔ لأن اللي بيكدب ده بمرور الوقت🕣 بيكون محترف وبيقدر يتفنن في الكدب عشان يقنعك وتعدي أدام عنيك القصة بالظبط زي ما هو راسمها، مش زي ما عقلك بيستوعبها.
✔ لأن الكداب بيستغفلك ويضحك عليك...
✔ لأن الكداب مش بيحترمك...
✔ لأن الكداب مش بيقدر العشرة ولا الجيرة ولا الزمالة ولا القرابة...
✔ لأن الكداب انسان مش اصيل...
✔ ولأن الكداب بيتعمد يأذيك ويهين ذكائك...
هو ليه بيكدب؟
⬅️يمكن بيكدب عشان خايف،
⬅️يمكن بيكدب عشان يداري،
⬅️يمكن بيكدب عشان يخبي حقيقة،
⬅️يمكن بيكدب عشان هو منافق:
" آية المنافق ثلاث: إذا حدث كذب ، وإذا وعد أخلف ، وإذا اؤتمن خان"
في ناس حوالينا كدابة بطبعها، يمكن شاطرة في الكدب وهتعرف تخبي لشهر اتنين تلاتة سنة بس لابد يوم تنكشف الحقيقة ولو ربنا بيحبك هتشوفها بعينك وهيسوقها لحد عندك، وده اللي حصل معايا. لكن سؤالي اللي مش لاقياله إجابة واللي مزعلني:
🤔 اذاي بتكدبوا علي حد فعلا مايستحقش كده؟ إيه كائن معجون بمية كدب؟
🤔 طيب ليه الطعنة دي؟ ده الصدق منجي!
🤔 ليه أكدب لحد ما اتكتب عند رب العالمين كداب؟
🤔 اذاي 🤔 تبقوا بتصلوا وتكدبوا؟ بتمشوا علي سطر وتسيبوا سطر مثلا؟
🤔 طيب ليه تستغفل حد مش وحش معاك ولا عمره أذاك ولا اتمني لك غير الخير ؟؟؟؟
✔ الكذب مش بيخبي الحقيقة لكنه بيأجل اكتشافها لفترة وده اللي بيحصل بس لما بتنكشف بيكون وقتها شكلك إيه؟ حكمك عند ربنا إيه؟ كداب؟ منافق؟
" إِنَّ الْمُنَافِقِينَ فِي الدَّرْكِ الْأَسْفَلِ مِنَ النَّارِ وَلَن تَجِدَ لَهُمْ نَصِيرًا"
انا فعلا مستغربة من الزوجة اللي بتكدب علي زوجها،
من الزوج اللي بيكدب علي مراته،
بتعلموا ولادكوا إيه؟
من الصديق اللي بيكدب علي صديقه،
طيب حقه عليك فين؟
من الجار والصاحب والبياع والقريب الكدابين
مستغربة منكم جدا بس مكتفية بالنظرة القليلة اللي بتشوفوها في المرايا كل يوم.
في #وجهة_نظري الكداب ممكن تكون فيه أسوأ الخصال👎 لأنه طلع السلم بالتدريج واتعلم واحدة واحدة الكدب ومشتقاته اتعلمه علي أصوله وبقي بارع فيهم👍، وبقي شاطر أوي في إنه مايتكشفش ويعرف يقص ✂️ويلزق ويداري ويخبي، بقي أستاذ في التأليف والإنكار.
😞 الوحش انه كمان بقي مش بيخاف لا من ربه ولا منك ولا من اللي حواليه ولا حتي ع اللي بينكم ، قلبه اتعود!
✔ هو قادر بكلماته انه يكدب، لكن تصرفاته قادرة تعلن عن الحقيقة.
⬅️ ابعدوا عن الكداب ده أسوأ شخصية ممكن تعرفها في حياتك، هو ببساطة مقتنع إن الكدب منجي وناسي إن الصدق أولي.
الكداب #تجنبه_حق_شرعي
البوست غير موجه لحد بعينه وكلامي في المطلق!
-
أميرة أحمدطالبة دكتوراة في تخصص اللغة الفرنسية وآدابها